蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年05月05日

李添勝:跳睇拖收視 劉天賜:咁就要問,為何跳睇!

今日《神探高布布》盡最後努力做宣傳。
建立時間 (HKT): 0505 06:00

播咗冇耐已經俾人嗌腰斬嘅無綫劇集《神探高倫布》,今個禮拜就大結局喇!今日一班演員喺荃灣盡最後努力幫個劇宣傳結局篇,順便為前日生日嘅黎耀祥補祝生日。祥仔對住台下觀眾好抵死咁話: 「真係長做長有,話停話停,咁快又話做完,都係多得你哋,套劇先可以有機會播完。」

而是非多多嘅馬賽就強調冇抑鬱症,仲話傳聞杯葛佢嘅龔嘉欣有講對唔住添!至於之前馬賽喺微博提到「日記」,佢就話當日除咗發生傭人偷錢事件,對方仲撕咗佢初戀男友寫嘅日記部份內容,令佢好唔開心。

關於呢套《神探高布布》死因,眾說紛紜。但因為個劇監製係有品質保證嘅李添勝,佢嘅《鐵馬尋橋》啱啱先喺深夜時份重播完,觀眾一追再追,冇理由同一個監製(仲要係品質保證),忽然會降呢0架。

之前添叔接受專訪時,就話今次個劇係一個新嘗試,唔想重複以前TVB嘅陳套警匪劇方程式,仲話所有劇情同角色變化都係有橋,但觀眾依然話睇唔明,係因為觀眾跳住睇,亦因而拖低收視。

唔少網民對於添叔呢個解釋都嘖嘖稱奇,有人話﹕ 「睇唔明就話我哋(觀眾)問題?」 「我好難可以坐定定聽馬賽講三十幾次布布囉!」 「觀眾點解坐唔定睇?因為你套劇唔好睇!」 「你之前啲劇係幾好睇,但就唔可以代表你嘅所有作品都係好先得0架,依套劇真係垃圾之中嘅垃圾嘛。」

就連當年喺《歡樂今宵》曾合作趣劇「掃街茂」嘅橋王劉天賜都忍唔住問咗句﹕「咁就要問,為何跳睇了!」 不少網民都好like賜官呢一句。的而且確,究竟今次係添叔走得太前,定係觀眾太「落後」,真係要好好研究吓先得喇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載