蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年05月13日

TVB大地震 有線外援踩平無綫親生仔

TVB親生仔VS有線空降兵。
建立時間 (HKT): 0513 06:00

來自亞視、依家過咗無綫做小生嘅陳展鵬,有四劇在手,拍得住視帝祥黎耀祥。備受力捧,又難怪陳展鵬心雄,仲爆咗句「TVB無大將」,令佢呢個外援上到位。

查實無綫蜀中無大將,唔關王維基事,而係因為一眾哥仔姐仔向北望,個個都想搵人仔,好似佘詩曼咁,yousee,幾成功。

依家無綫又唔係冇人用嘅,嗱,起碼有三大勢力:

無綫親生仔女:陳豪、陳法拉、謝天華、林峯、徐子珊
如前所述,由佘詩曼開始,一個二個三個親生仔女,已經唔希罕視帝視后,唔需要以約換獎。都係搵錢最實際。有乜嘢好得過返內地搵人仔?噚日已有報道話謝天華唔續約、轉戰內地;就連馬國明同楊怡都開到聲想北上拍劇;最令人驚訝係,連乖乖仔陳豪盛傳都心郁郁想走。

有線人:唔係「線人」,係「有線人」,代表人物包括翠如BB、洪永城、陸浩明、梁嘉琪等
先講翠如BB,多得由有線返回無綫嘅非戲劇製作總監余詠珊照住,搵佢入TVB,一嚟已經做女主角《心路GPS》。可惜反應麻麻。其他代表人物包括洪永城、陸浩明,就連本身喺有線都「面目模糊」嘅李佳芯,過埋TVB之後,即刻有機會做星期六嘅《學是學非》節目主持添。令人好奇,李佳芯是誰?有何過人之處,令佢可以輕易揮低無綫其他姐仔呢?

亞視人:代表人物,唔使講,一定係陳展鵬、萬綺雯、陳煒同田蕊妮
萬綺雯sell長腿,地位穩如泰山,陳煒專演尤物;田蕊妮……好努力,但有人遲來先上岸。之前就有報道話,明明大塊田做女主角,點知殺出個翠如BB,戲份被減。係喎,仲有個陳展鵬。監製李艷芳愛將,頭先第一集《情越海岸線》,陳展鵬完全搶晒第一男主角黃浩然嘅鏡。個劇明明係食住黃浩然前作《情越雙白線》拍0架喎。

三國混戰,必有死傷。當中又似乎以無綫親生仔女勢力最弱,是以有報道話,好似翠如BB同洪永城兩個零演劇經驗嘅都可以喺新劇當主角;黎芷珊姐姐又被有線嘅陸浩明截糊、由佢嚟主持多個新嘅綜合節目,所以有報道話,好多TVB藝人都睇唔過眼。報道仲話,某啲「外援」新人拍劇時時NG、又恃住有高層撐所以工作態度差,連陳豪同黎耀祥都忍唔住要向高層反映,仲話佢哋對有線班「空降師」不滿到極。

今日喺無綫電視城舉行嘅「2013年上半年度傑出員工頒獎禮」,監製陳耀全同李艷芳都得獎。對於有傳無綫高層撐外援唔buy自己人,有份出席嘅高層曾勵珍話絕對唔會: 「我都睇好佢兩個,希望大家唔好再分幫派,我唔覺得有人話余詠珊加入後拖垮咗無錢。」 珍姐又話同陳豪傾緊約喎。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載