蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年05月16日

Cammi師妹爆料男藝人撩床戰

大圖呢位,就係「翻版君馨」、Cammi師妹Victoria。有知情者話高鈞賢想同佢「深入了解」喎。
建立時間 (HKT): 0516 06:00

七月又到,唔係鬼節嗰個七月十四,而係寫真展又嚟。嘩,真係得人驚過鬼節。尤其是嗰啲千奇百怪嘅宣傳手法,真係未開波先興奮。

好似呢個叫做Victoria、中文名叫譚詠怡,身份係Cammi師妹嘅0靚模,今次成功爭取見報喇。今日有報道話,呢位Cammi師妹,三圍34B、25、34。個樣靚過CammiBB多多聲,今年暑假出處女寫真喎。報道話,佢同無綫二線小生高鈞賢過從甚密。

報道除以「翻版王君馨」形容Victoria之外,仲影晒相,見到呢個翻版君馨同高鈞賢喺街上又攬又抱又拖手,時間係上周五(10號),地點係灣仔,當時女方同高鈞賢走入一間酒吧,由夜晚11點玩到凌晨5點先出嚟,成隻樹熊咁攬實高鈞賢走人,雙雙上咗的士。車上兩人好似連體嬰咁,女方依偎喺高鈞賢身上,仲話到兩人頭貼頭似喺度咀嘴咁。不過最後冇下文,高鈞賢送咗佢返土瓜灣寓所之後,自己都坐車返將軍澳寓所。

好戲在後頭呀,報道話,有「知情者」報料,指佢兩個係早前喺澳門一個派對認識,交換電話之後,有人不時whatsapp女方「撩床戰」,又話出過幾次街,但一直都未「成功」。報道仲指,呢位「翻版君馨」接受訪問時,就口窒窒話當晚喺灣仔同高鈞賢一齊嗰陣又攬又拖手,係因為「我嗰晚好醉!」

要出寫真要上位,肯定要諗啲計。而且所謂「撩床戰」呢條宣傳橋,之前LuLu王璐瑤之於余文樂都出過。朋友約飲酒醉醉地拖吓手攬吓都好平常,而且當晚根本都冇下文。一句「知情者」就可以點講都得……但可信性呢?不解釋。高鈞賢就話,當晚女方飲醉咗、想高送佢返家,咁咪送囉。就係咁之嘛。



逢周五隨《蘋果日報》附送嘅時尚美容雜誌《add》第二期已出版;拎唔到書嘅朋友,可以上番《add》嘅官網 http://hk.add.nextmedia.com/ 睇番足本網上版,除咗有陳慧琳訪問,仲有好多時裝靚嘢睇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載