› 選擇地區
三藩市
紐約
洛杉磯
其他美國地區
香港 台灣 北美
 
2013年05月21日

【情越海岸線】茵媺「浴」搏黃浩然 擦背又吹耳

抱抱向張保仔吹耳﹑擦背撩心口泡泡....幻想嚟咋...(電視截圖)
建立時間 (HKT): 0521 06:00

無綫劇集《情越海岸線》內,張寶生/張保仔(黃浩然飾)同鄭抱抱(陳茵媺飾)起初係歡喜冤家,但今晚嗰集就講到張保仔明顯對抱抱產生好感啵。

今集仲有張保仔出浴鏡頭,露埋結實胸肌添,不過佢就搞地笑戴住浴帽,仲用埋佢個妹張文鳳(樂瞳飾)啲浴油浸浴,兼且幻想抱抱入浴室幫佢沖涼,張保仔嘅幻想片段內: 抱抱出手撩男方心口的泡泡﹑又除埋外套僅穿背心幫佢擦背﹑最後送埋按肩及吹耳,High到張保仔反眼,場面香艷 。估唔到無綫噚晚益完鄧健泓後,今晚就益黃浩然。

不過張保仔最後被文鳳喪敲廁所門,令佢從夢中驚醒過來,文鳳仲掀開阿哥件浴袍,聞到陣浴油味,即時忟憎鬧爆阿哥。

第二日張保仔出動80年代屎橋,懶係喺街撞到抱抱,諗住爆句:「乜咁啱嘅?」,藉以打動伊人芳心,不過受傷收場;之後佢同抱抱去茶餐廳醫肚,點知食咗件花生西多士, 原來張保仔對花生過敏,食完即變電影《東成西就》內梁朝偉嘅孖膶腸造型,相當搞笑﹗

劇情下半部份,又再講返過氣戀人嘅郭希雯/Heidi(李詩韻飾)﹑Vincent(鄧健泓飾),以及Fit榮(陳展鵬飾)及Amy(沈卓盈飾)嘅愛情四角錯。

今晚Heidi約返Vincent喺酒吧相見,而Fit榮就打匿名電話搵Amy,等佢睇清楚Vincent真面目。

當Heidi同Vincent密會時,Vincent對Heidi亦有所動作,用手輕摸玉背兼掃秀髮,兩人仲差啲咀嘴添,此情此景畀Amy睇晒,不過Vincent為求自保,竟反咬係Heidi纏住佢,Heidi一怒之下成杯酒潑落Vincent塊面,令佢相當狼狽。



逢周五隨《蘋果日報》附送嘅時尚美容雜誌《add》第三期雖然早已派完;拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有何超瓊專訪,仲有好多時裝靚嘢睇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載