蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年06月12日
馬上成為壹會員

舊愛魏駿傑又講滕麗名? 「不跟她結婚就是罪人」

魏駿傑同老婆張利華上內地節目,無啦啦拎舊愛出嚟講,講到自己好委屈咁,想點?
建立時間 (HKT): 0612 06:00

本月初,37歲嘅滕麗名接受訪問時,直認已經接受Canon高層朱建昆(Matthew)求婚,嫁杏有期,但同時亦難免令人聯想到舊愛魏駿傑。兩人拍拖足足9年,都係分手收場;以為傑仔係浪子唔想結婚啦,點知話咁快就同19歲內地女生張利華結婚,仲好快咁連女都生埋。

做唔成夫婦,都唔使變仇人,不過滕滕同傑仔呢對過氣情人,關係似乎真係麻麻。2010年就發生咗一單隔空互片事件。當時傑仔喺微博上載一張抱女相,即有網民話﹕「若是他跟滕麗名一起就更perfect」,傑仔即回覆﹕「這種賤人趁早撇低,否則後悔一輩子﹗」有網民直指係衝住滕麗名而來,紛紛留言戥阿滕不值。阿滕即回應﹕「幸福嘅人係唔會周圍鬧人。」事後傑仔表示就話嗰個留言係黑客入侵,唔關佢事,亦唔關佢老婆張利華事。

好喇,歷史講完。上月底傑仔同老婆一齊上咗深圳衛視節目《男左女右》,本來好好地,點知傑仔忽然燒埋阿滕一疊,認真不該。

當時係咁嘅,主持人問張利華,如果當日傑仔唔肯公佈婚訊,佢會唔會嬲?張利華就話﹕「我覺得女人都不會接受吧,因為都想得到大家的祝福嘛。」傑仔亦都話冇諗過隱瞞。「雖然我即屬於娛樂圈,但是我覺得結婚就結婚,沒甚麼。」至於結婚之後對其事業可有影響,傑仔當時就咁話喇﹕

「有,絕對有,觀眾覺得,我跟以前這個拍拖那麼多年,在戲裡面又是情侶,就已經覺得,我非得跟她結婚不可。」講到呢度,鏡頭pan向張利華,只見佢搣搣嘴角,似在冷笑。

傑仔開始變得激動,兩手比劃﹕「我不跟她結婚,我就是罪人。我就是壞人,(負心漢)對。但是我告訴你們,我為甚麼這麼快結婚,我拍拖才三次左右,七年,九年,十年都分開了。」張利華不斷點頭,其他嘉賓就「嘩﹗」傑仔續說﹕「為甚麼分開,我能告訴大家,有一個調查,拍拖三年內結婚的,離婚率非常低。」眾人又「啊」。傑仔再話﹕「拍拖七年八年才結婚的,離婚率比三年以下結婚的,高30%到40%。」就係咁,一次過解釋咗點解唔娶拍拖9年嘅滕麗名、而娶拍拖冇耐嘅張利華。

滕滕,一定要幸福啊﹗


《男左女右》影片連結﹕(約由14分鐘開始睇)
http://v.youku.com/v_show/id_XNTY1MTMxOTY0.html

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載