蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年07月04日

【主播鬥法】 張文采男友羅鈞滿強出頭 網民寸爆:「七線當三線」

張文采男友羅鈞滿話自己係三線,其實……
建立時間 (HKT): 0704 06:00

無綫互動新聞台主播張文采,被指擢升為高級記者後,用權力欺壓另一主播黃紫盈,更令對方淚灑幕前。不少網民傾向撐黃紫盈,而張文采至今仍未有回應。

張文采有微博但唔回應,但係佢男友羅鈞滿就有。今日凌晨近兩點左右,羅鈞滿寫道: 「她只是默默耕耘做好本分等待機會的人,她沒有想過耍任何手段博上位,沒有想過一步登天。她只是一位簡單的傻大姐。她被欺凌,路過刻意被撞、被罵,都沒展露過半點。如果她是一位出賣同事爆大獲(鑊)博上位不果再施淚功以圖成名毀同事前途的女子,怎會跟上一位連真實名字也說不出的三線藝人。淚,該向肚裡流。」

睇完上半截,明白;睇下半截,就唔明白。尤其係 「如果她是一位出賣同事爆大獲(鑊)博上位不果再施淚功以圖成名毀同事前途的女子,怎會跟上一位連真實名字也說不出的三線藝人」 ,句子咁長但得一個標點符號,仲要係,明明係講緊張文采,但喊嗰個係黃紫盈,唔少網民讀到呢度,都話唔明。

張文采男友缺文采,呢句網民「評點」已屬客氣。有人就估,可能黃紫盈之前都寸過羅鈞滿「三線藝人」,亦有人猜測,根據呢段文字,可能係暗示張文采事後都有喊過,不過冇出聲而已。

之不過,對於羅鈞滿呢段「護花宣言」,網民睇法都好一致,覺得羅鈞滿此舉「幫倒忙」,令事情惡化,事關女人的戰爭,男人不宜插手。亦有人覺得,羅鈞滿未必掌握形勢、知道真正發生咩事,佢好可能都只係聽女友張文采一家之言,聽完就寫咁大段文、曲線插黃紫盈,對黃亦有欠公平。

對羅鈞滿最「不滿」嘅,唔係黃紫盈嘅fans,而係張文采。點解?因為佢追咗張文采囉!羅鈞滿自嘲一句話自己係三線藝人,照計應立於不敗之地,點知,大把網民話佢 「明明係七、八、九線藝人,卻話自己係三線」 「陳國邦古明華就係三線,你只係五線咋。」 唔使咁盡嘛?

高登巴打就更加不遺餘力……一來唔like羅鈞滿追咗張文采(其實佢仲同過now主播葉文炘一齊0架﹗)二來,羅鈞滿喺《護花危情》嘅角色,就係叫「巴打」。於是班巴打好出力咁,貼羅鈞滿「死相」——包括《護花危情》同《仁心解碼2》……其實,佢喺《天與地》飾演少年版鼓佬,最後鼓佬都係要死0架……。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載