蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年07月05日

【龍小菌開班】 少經驗、收咁貴、只上四堂 小菌點反駁?

建立時間 (HKT): 0705 06:00

龍小菌「星級」之路,同《求愛大作戰》一眾參加者一樣,齊齊起飛,齊齊邁向成星路上。雖然龍小菌做咗星級補習老師後,好想大家當佢真係一個老師咁睇,唔好當佢係明星,不過,有難度。睇埋佢訪問回應,兩個字… 唔明

問:驚唔驚學生會嚟睇明星、唔係真心想上堂?
小菌老師答:「唔驚,始終唔係一個好平嘅價錢,咁所以希望佢哋唔係純粹為睇星而嚟上堂。」

問:覺唔覺得收費太貴?
小菌老師答: 「呢個係補習社定,唔係自己訂價,咁所以覺得…學校都係覺得應該收呢個價,先至用呢個價錢。我唔知有冇再top啲。」

問:你係收最top個價喎﹗
小菌老師答: 「吓,係呀?咁多謝公司睇得起我,佢先選擇用呢個訂價。始終我都要去做準備,始終我都係要去備課,先可以俾到學生物有所值嘅感覺。如果價錢太貴,市場會將我淘汰。」

問:補習學校幾時搵你0架?
小菌老師撥一撥頭髮答: 「其實喺我戴住面罩嘅時候,已經有搵我,大約係半年至九個月左右。我嗰陣仲問,我可唔可以戴住個罩教?但佢就話唔得,一定要除咗佢教。」

問:依家做補習老師收入、係咪比上年做教師多?
小菌老師答: 「因為以前係計月薪嘅,咁所以同依家比…我唔知會收幾多學生,我諗要睇吓收到幾多學生先知酬勞幾多。(係咪拆帳?)呢個……呢個我交番俾經理人去跟,我只係關心自己教唔教得好。」

問﹕你嘅教學經驗相比其他導師好似少啲喎,而且人哋不斷教緊,你就唱緊歌…
小菌老師答: 「我覺得莫欺少年窮,雖然我教學經驗唔多,但唔代表我唔識得教書。其實每一次實習,我都係拎distinction,最好嘅級數,所以都唔驚。」

問﹕依家幫補習學校教書,係咪同以前教高中有教無類嘅理念違背?
小菌老師答: 「我以前喺正統學校教中文,其實教嘅嘢係一樣,只係好多時間花喺行政上。如果可以集中教中文,教學嘅效能好好多。」

問﹕會否貼題呀?
小菌老師: 「我會教好多範文,等啲學生睇:『咦,呢篇文章我以前睇過喎。』幫佢哋打咗底先。依家好難貼題喇,範文已經冇咗,好多文章我哋要去睇,我哋可以做嘅,就係俾多啲範文學生睇多啲唔同嘅文章。」

問﹕又要做歌手,會否難兼顧?
小菌老師答: 「其實學校好好,俾充足嘅時間我準備教學。其實依家我一個星期只係上兩日,兩日教四堂,暫時暑假教八堂左右。我相信我有足夠時間準備,我相信比正統學校有更多時間備課。」

聽完小菌老師咁講,真係覺得好矛盾……一個星期上兩日、共四堂,但又話自己有足夠時間準備兼唱歌(未計訪問同宣傳,以及私人活動);教學經驗不多,但竟可以話自己好多時實習都係拎distinction……實習同實戰,豈可混為一談?

對上一次教書已是去年中嘅事,但可以收得全行最貴,不過唔包貼題;明明係明星價,但小菌老師就叫大家,唔好抱住一個睇明星嘅心態來上課。問題又回到根本……唔夠經驗又未必真係有充份時間備課,同時又唔包貼題兼且每個學生只係上得四堂,形同「雞精班」,咁,即係點?

大家要上一堂邏輯課嗎?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載