蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年07月07日

絕望港女拍片求救? 「受害者」現身:我冇死到

呢位聲稱係「片中受害人」嘅許芯悅,今朝喺facebook一連貼咗兩個status,話自己平安無事,冇死到。
建立時間 (HKT): 0707 06:00

今日凌晨時份大家上facebook嗰陣,唔知有冇嚇一跳,事關網上瘋傳一條短片,由一名稱執到iPhone嘅男子發佈,片中一女子表示,身邊朋友都死晒,佢好擔心自己係下一個,仲喊晒咁話:「對唔住呀媽咪,我唔知以後可唔可以再見到你呀!」

見到條咁嘅片,究竟擔心佢好定係報警好?抑或交俾網民「人肉」咗佢先?結果,全部做齊,出事啦。結果條片上載唔夠一日,upload條片嗰個突然話片段係電影《生前必做七件事》宣傳片。欺騙港人同情心,邊個高人諗出嚟0架?

警方表示已經喺黃大仙區搵番片中「有生命危險」嘅23歲女事主,佢都話條片只係宣傳片。網民力量真係強橫,半日唔夠已經起埋底,原來呢位「女受害者」叫許芯悅(KatieHui),曾經拍過港台教育電視同埋唔少廣告,包括豐澤、香港傳藝中心及肺炎球菌結合疫苗等等,表情多多,幾識做戲。網民更加喺佢facebook搵到張相,相中許芯悅著件Tee,同條片一樣。

今日一早,自稱「許芯悅」喺佢個facebook「報平安」,寫道: 「大家唔使擔心,我無死到,人身絕對安全,詳情稍後向大家通報。各位一定不需要再報警,亦無需要擔心。對各位做成不便,真對不起。」

一小時前,自稱係許芯悅於facebook再寫道: 「大家不用猜測,我及我某幾個朋友的whatspp於2013-07-04下午已刪除帳戶,所以大家有誤會。」 方才離開警署時,再次道歉。其實除咗用「腦殘」形容之外,真係冇嘢好講。報咗「平安」、道埋歉,但令人白擔心一場,仲驚動埋警方擔心你有生命危險。下次會否狼來了?大吉利是講句,下次若真係有人於facebook求救,大家會否當成笑話一則?

網民唔係嬲自己受騙,而係騙呢部戲嘅「宣傳班底」消費了香港人的同情心,紛紛留言鬧爆: 「你好冇腦!同埋好幼稚!玩啲咁嘅嘢!」、「真係不知所謂!整個製作團隊都係智障!祝賀套片刷全球新記錄:0人入場率!恭喜!恭喜!」

以為講笑?其實唔講得笑。性命攸關,豈可亂拍條片引起恐慌然後一句「對不起」話係電影宣傳就冇手尾?有網民話:「好老實講,如果呢單嘢冇手尾跟嘅話,以後一定仲會有大把類似呢啲片。到有一日真係有人放片求救而香港人唔再理,就係你哋累死人。強烈要求警方正視呢單案件!唔好俾廣告公司開到先例!」、「知唔知有好多人需要警察嘅幫助,因為你嘅所謂宣傳,而搞到警方派人上門調查是否有人生命受到危害,浪費警方就係你呢啲港女lo」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載