蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年07月16日

【星夢傳奇】 羅鈞滿「訴苦」:忙到冇時間練歌

《星夢傳奇》嚴格嚟講,令未紅嘅小生多咗機會。
建立時間 (HKT): 0716 06:00

《星夢傳奇》呢個節目,即使係藝員騷又好、無綫想捧紅三四線小生花旦都好,起碼節目嘅目的已達到。觀眾開始記得參賽者係邊個打邊個,除咗一唱成名嘅鄭俊弘 (噚晚睇《師父,明白了》,即刻多咗人認得鄭俊弘,驚叫:「鄭俊弘都有份演呀!」) 、仲有唱音樂劇嘅李璧琦,不過後者已經喺前晚第三集嘅錄影同被指內定三甲嘅梁烈唯齊齊被out。

另一參賽者羅鈞滿,亦因為《星夢》,令外界對佢嘅認知,唔再局限於只係「無綫主播張文采男友」,不過第一集被評判巫啟賢彈佢音準有問題,但仍可留低...

今日凌晨4點幾,羅鈞滿仲喺微博度唔知訴苦,定係晒命喇: 「第四集(星夢)雖未錄影,但四五兩集錄影日期太近,參賽者都要預選第五集的歌。其實昨日已是第五集交歌限期,但前晚第三集錄影後,辦好手頭的事已凌晨時份。昨午二時進錄影廠,那邊拍攝這邊處理第四集歌曲事宜並電郵給同事。拍畢回家,已經近凌晨三時,心儀的歌又不能放聲試唱,待明早又要做訪問,怎辦?怎揀?」 又要做平時嘅嘢,再加參加《星夢》,啲期真係密質質嘅。咁就要問問無綫點擺位喇,想要捧歌手,定係要搵人拍劇?

又或者應該問羅鈞滿一句…你寧願冇工開全日得閒練歌,定係維持原狀?

網民都係叫放鬆啲之類,不過有其中一位就話:「點解不能直播呢?咁留俾我哋一啲驚喜,你哋亦都唔會咁辛苦啦。」嗱,要佢哋Live,真係難啲,萬一應間走音/甩嘴/唱錯歌詞/跌咪...大家覺得無綫會唔會俾呢樣嘢發生?

原本以為會一直唱到最後嘅梁烈唯,都難逃被out結局,不過就有阿倫譚詠麟送上鼓勵:「被淘汰的不要氣餒,娛樂圈是條很長的路;不到終點不知輸贏!」氹得唯唯好開心,不過,學網民話齋——

「都係專心拍劇啦!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載