蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年07月16日

【圖輯】阿嬌哭了!

阿嬌哭了﹗
建立時間 (HKT): 0716 06:00

深刻經歷過後會令人待人處事有所改變,以往個性掘強的鍾欣桐(阿嬌)喺單飛過程中經歷好多;推出首張國語專輯後,比以往更懂得表達自己。今日公司為佢喺紅磡舉行《桐花》大碟祝捷會,兼宣佈全國錄得六萬隻銷量雙白金佳績。

高層吳雨大哥話:「今日呢個會場《天澄閣》揀得好好,因為雨過天晴,阿嬌失去過去嘅,依家得到更多。」睇住佢大嘅霍汶希(Mani)仲話好耐冇聽過人讚阿嬌唱歌好咗,今次好多人好多同事讚。其間阿嬌更忍唔住流淚,點知越抹越喊,最後索性擰轉身抹淚。

阿嬌承認自己唱國語歌同廣東歌係兩把聲,一直都鍾意唱國語歌,好彩公司能夠畀機會佢出碟,佢話:「有段時間我好大壓力,唔想再唱歌,加上我係一個唔識表達自己嘅人,由細到大都唔合群,又成日轉學校同屋企,令本身冇乜自信,所以一上台就驚,0依家有人讚會有信心番好多。」

阿嬌話佢會繼續唱廣東歌,嚟緊要返內地拍劇,希望遲啲有時間學唱歌。另外佢日前上台灣遊戲節目時,當試玩跳越障礙時,唔小心頭落地、觸及舊患,令右邊膊頭舉唔起。玩遊戲玩到咁激,真係要小心小心喇。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載