蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年07月28日

【星夢傳奇】何傲兒「選擇」錯誤
走音出局 壽星張振朗遊魂參賽

20,345
建立時間 (HKT): 0728 23:48
何傲兒及「翻版黃宗澤」張振朗雙雙出局,哭成淚人。(電視截圖)(電視畫面)

今晚一集《星夢傳奇》主題係講「扶持」,六位參賽者包括高分王鄭俊弘﹑張文采男友羅鈞滿﹑「翻版黃宗澤」張振朗﹑張明偉﹑何傲兒及新加入嘅「鬼妹」陳明恩及王君馨對戰,眾藝員各自搵Partner參賽。

上集唱葉蒨文《情人知己》嘅何傲兒,今集搵嚟敖嘉年合唱《選擇》,兩人仲以古裝打扮示人,不過傲兒今次明顯失準,除咗走音外,唱唔返上次水準,評判之一郭偉亮批評佢走音多,兩人把聲唔係好夾;

另一評判陳潔靈亦認為呢首歌唔易唱,當年佢同林子祥合唱時,都覺得好辛苦,Miss Chan Chan評傲兒唔識運用丹田唱歌,唱出嚟太平坦,欠缺抑揚頓挫。結果何傲兒僅得144.7分,包尾出局,傲兒亦忍唔住喊咗出嚟,要用紙巾拭淚,佢坦言有啲唔開心,不過亦自覺表現冇上次做得咁好。

至於「翻版黃宗澤」張振朗搵嚟巨聲幫出身嘅陳鴻碩合唱《你那麼愛她》,原來錄影當晚適逢張振朗生日,可惜佢願望未能達成,佢哋呢Pair僅獲149.6分,尾二出局。

Miss Chan Chan讚佢練高音練咗好耐,但其實唔可以集中練一部份,同埋覺得佢感情表達要再立體啲,唔好只係喺高音部份下工夫;Eric Kwok亦畀佢60分低分,Eric話佢容貌同聲線都似黃宗澤,佢話唱歌同演戲一樣,要好聽好睇,又嫌佢面部表情欠奉,好似遊魂一樣,唔能夠做到人歌合一,張振朗講感受時都忍唔住流下男兒淚,場面感人。

張振朗雖然生日出局,不過司儀鄭裕玲及評判周啟生,先後獻吻賀壽星仔,全場亦唱生日歌送畀張振朗,總算補番數。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載