蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年07月28日

【星夢傳奇】鄭俊弘再蟬聯高分王 險勝羅鈞滿

鄭俊弘其實今集表現麻麻,但仍蟬聯高分王美譽,而羅鈞滿就愈戰愈勇。(電視截圖)
建立時間 (HKT): 0728 06:00

今集《星夢傳奇》高分王繼續由鄭俊弘蟬聯,得分172.1分。因為集今主題係「扶持」,故每位參賽者都請來一位嘉賓一齊唱,鄭俊弘就請來了單立文一齊唱TheBeatles嘅《IfIfell》。不過平心而論,鄭俊弘嘅表現未如之前幾集咁理想,EricKwok俾70分,佢話:「唔可能次次都揀啱歌,之前睇唔到,但今次真係覺得你有少少造作,證明呢類歌唔啱你。」

鄭俊弘係大家嘅「希望」,正所謂愛之深,責之切,俾分同評語時都免手緊一啲,令單立文(豹哥)都肉緊埋,忍唔住評判講一句、佢就幫口駁一句。豹哥聽完EricKwok咁講、話鄭俊弘造作,即問一句:「咁我呢?」Eric就話:「你可以再好啲囉。」

另一評判周啟生就俾83分,連佢都feel到鄭俊弘壓力大,所以有啲緊張,希望佢多番啲陽光感。單立文又話喇:「等我解下話,Beatles呢隻歌係好陽光嘅,我亦都答埋Eric,青蔥歲月嘅年紀,啱佢,但有我喺度,我講真0架,起咗化學作用,我嘅歷練,我要融合番佢,愛情其實都要小心…」於是扮到好sunny好天真咁唱咗幾句,再話:「Eric,可能你結婚嘅日子短,同個老婆好恩愛…」崔建邦即緊張謂:「有事咩?」單立文即謂:「唔係…」

周啟生再謂:「你係後生仔,俾番少少陽光,唔使變0架…」單立文又搭嘴話:「佢其實係話俾你知,呢個後生係有啲黑暗面,所以我都要帶番佢出嚟…佢有啲唔開心嘅故事,之後大家會知佢背後嘅故事。」單立文仲想繼續講落去,嘟嘟姐已經出言制止,周啟生亦連聲道:「知喇知喇!」嘟嘟話:「搞佢唔掂呀!」

評判陳潔靈苦笑道:「唔係呀,我有啲搞錯咗,我想知究竟係豹哥參賽定係佢參賽,可唔可以俾啲分,佢係有啲歷練,但佢依家將啲歷練擺咗喺參賽者上。阿豹哥,我識咗你廿幾卅年,有啲嘢你要顧吓啲後生仔,唔好將你啲歷練擺喺後生仔度。」豹哥反應甚快:「你都叫得阿哥喇,咁梗係有咁盡踩咁盡啦。」

第二高分係羅鈞滿同拍檔楊潮凱,二人選唱《我們都是這樣失戀的》,周啟生俾分95分,大讚佢比首集改變好多,有進步,又讚佢好厲害好叻仔仲好抵錫;反而Eric就依然手緊,原來佢有睇《師父,明白了》羅鈞滿演出,同之前俾黃智雯評語係嗌專心演戲一樣,事關Eric覺得做演員一啲都不易呢。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載