› 選擇地區
三藩市
紐約
洛杉磯
其他美國地區
香港 台灣 北美
 
2013年08月01日

【撐林老師】秋生寸警權轟青關會 「成個警隊對付一個女老師都幾好笑」

建立時間 (HKT): 0801 06:00

寶血會培靈學校教師林慧思早前怒罵警察執法不公,愛港力成員及家長組織發起下周日在旺角舉辦集會,聲討林老師,有網民揚言號召萬人踩場。今日阿澤杜汶澤都喺facebook寫道:「支持林老師!」

藝人關心政治,不討厭政治,願意走進社會,勇於表態,實屬美事。阿澤聲已出,自言成為強國網民眼中的「戲子賤民賤籍包衣奴才雜種假洋鬼子」黃秋生,也打破沉默——不過,唔係喺微博表態喇,而係facebook。

秋生分開四個post,一諗起就寫,再諗到又寫。佢先寫道: 「成個警隊對付一個女老師都幾好笑。」 然後再說: 「好消息好消息,只要打住愛國旗幟,就算去打劫睇怕香港警察都唔敢拉你。」

其實今次事件,緣於當日法輪功喺街頭展示中共摘取死囚器官販賣之惡行,親共團體青年關愛協會(簡稱「青關會」)無啦啦踩對方個場,強行用大型橫幅遮擋法輪功攤位。但警察唔單止由得青關咁做,仲將附近路面用封鎖線圍起嚟。林老師路見不平,走入封鎖線內同警察理論,質問佢哋點解縱容青關會干預表達自由,點知警察話要拉佢,林老師即謂;「我一定企喺呢度,同你哋鬥企,你哋唔係第一次咁樣對法輪功,我唔係法輪功嘅人,我係真真正正嘅香港人。我睇唔順眼你哋青年關愛協會,咁叫關愛?咁係侮辱我哋香港市民。你羞不羞恥?警察仲幫佢哋?」嬲到興起嘅林老師忍唔住講英文粗口。點知就有人借機大造文章,用banner、facebook舖天蓋地發動所謂群眾力量指摘林老師(「批鬥」?),就連警務督察協會都發聲明譴責林老師,但完全對警方執法不公完全當「睇唔到」。

難怪秋生再寫道: 「青關會,青幫關閉你個會。」 之後再補充道: 「我想成立紅興會,哈哈哈。」 係紅興唔係洪興,大飛哥,做嘢啦。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載