蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年08月28日

郭富城偷運新城嫂過夜 驚動警方誓保葉熙祺

來自內地嘅葉熙祺,盛傳晚晚攻城、足不出戶陪住城城,好積極喎。
建立時間 (HKT): 0828 06:00

現年47歲嘅郭富城同熊黛林(Lynn)分手後,近日同23歲內地女藝人葉熙祺打得火熱。雖然城城未肯承認新城嫂身份,但葉熙祺卻頻頻來港跟城城共聚,難怪仙樂都忽然自爆曾「攻城」兼幫城城做facial,即激到葉熙祺生蝦咁跳鬧垃圾。

葉熙祺繼上月被發現入住城城大坑道嘉園豪宅、並逗留30小時後,前晚葉熙祺又再度到城城家攻城,但城城不欲傳媒追訪新城嫂,不惜大玩調虎離山計,有人甚至驚動警方到場驅趕傳媒,認真大陣仗。

據知,葉熙祺近期來港鮮有出外逛街,多數都係逗留城城大坑家中密會。據悉前日凌晨時分,葉熙祺又秘密來港,更一直留喺城城屋企,足不出戶。

前晚9時許,記者見城城家有人拉動窗簾,似係想查看寓所樓下記者蹤影。至晚上11點半,警方到場,聲稱有人報警指大廈外有人聚集,並着記者將採訪車駛離大廈。

凌晨12點,一部拉上窗簾、司機位後掛上太陽擋嘅銀色七人車先駛離城城寓所大廈,直駛往大埔元洲仔,應該係城城想以呢部七人車引開記者;到12點20分,葉熙祺乘坐由城城好友周文曦駕駛、同樣拉上窗簾及掛太陽擋嘅黑色七人車離開寓所。因為仲有記者追訪,最後周文曦惟有駛入MayFair豪宅,俾葉熙祺再轉乘另一部車離開,擺脫傳媒。

同葉熙祺密會後嘅城城,噚日下午2點離港往馬來西亞工作。戴上墨鏡及大耳筒嘅城城,被問到葉熙祺是否在其寓所過夜時,一概扮聽唔到,但全程面帶微笑。似乎有愛情滋潤,真係零舍唔同。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載