蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年09月01日

【盛品儒辭職】 亞視金句:冇打燈更真實 維基破格拍全夜景新劇

香港電視全夜景新劇《NightShift》。相片完全冇經過調色。
建立時間 (HKT): 0901 06:00

亞視執董盛品儒宣佈辭職,由高級副總裁雷競斌兼王征親信接任,即係換湯不換藥,同冇換係冇分別,仲可以令亞視減低被釘牌之機會。

之不過,亞視內部逃亡潮不息,噚日已有報道話逾50人辭職求去,包括撐發牌嘅亞視一哥陳啟泰、林韋辰,同近年大家唯一認識嘅亞洲小姐馮雪冰。

幕前缺人,幕後一樣慘烈。有指一個新入職PA要一個打十個,包辦寫稿帶藝人,仲要拍外景,身兼多職。好,又係時候再引述一次高級副總裁葉家寶金句: 「我一直都唔贊成成隊外景隊出去拍嘢,我覺得越精簡越好,人少出錯機會低,冇打燈更有真實感。新人好快就接手包辦製作,我覺得要俾新人機會。」 更強調亞視有嚴格QC。

唔打燈等同更有真實感,真係聞所未聞。但係,王維基嘅香港電視卻用另一種方式話俾大家知,黑麻麻,真係更有真實感,唔止可以拍一個劇,仲可以改埋劇名。

自從日前發出聲明證實裁員後,眾旗下藝人眾志成城,未有講半句洩氣說話,繼續開工為發牌努力。噚日其facebook官方專頁仲介紹呢套名為《NightShift》嘅新劇, 「一套全夜景拍攝的劇集,一切故事始於黑夜、終於黑夜。」 講幾位EU衝鋒隊隊員貫穿黑夜中不同夜班工作嘅人同事,面對各式不可思議嘅危險同挑戰,喺黑夜當中,人亦變得脆弱,自我防護與約朿能力變得不堪一擊……。成個劇都係全夜景拍攝,除咗電影《PTU》同《旺角黑夜》,香港電視劇,好似真係未有過。

講開「黑麻麻」同打燈呢個問題,之前香港電視喺YouTube試播《歲月樓情》、《開腦儆探》同《警界線》等片段,但畫面比較暗,令一向睇開TVB廠景「世界光」嘅香港觀眾感到「不適」…不適應。其實維基劇係參考美劇拍攝方式,畫面、燈光調度、拍攝手法等等都同大家睇開嘅師奶劇好唔同。

咁當然,「冇打燈」同特登拍出嚟暗暗地,係兩回事。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載