蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年10月11日

【短片】【再見理想!】九龍塘理想酒店清拆 懷念《表姐》張水床

有人話《表姐你好嘢!》嘅房入面其實唔係真係理想酒店。
建立時間 (HKT): 1011 06:00

九龍塘係好多港人心目中嘅「開房」勝地,尤其以「理想酒店」最為人知,直頭係該區地標。位於九龍塘根德道7號嘅理想酒店,即使未去過光顧,都一定會知道,就連亞視出採訪通告、出車入大埔亞視總台,集合地點都係理想酒店。

「理想」可以成為咁成功嘅偷情勝地,主要原因係當年九龍塘比較僻靜。慢慢九龍塘開始發達,商場同學校都開始多咗,但「理想酒店」仍然名氣十足,因為啱啱好喺港鐵站同巴士,就算怕尷尬唔會約係「理想酒店」等,都會講句喺「理想酒店」附近,難怪有人話:「理想酒店個位其實最唔理想。」咁又係,喺正路口,真係一眼睇晒……係俾人睇晒。有人介紹話可以由側邊後門、即真光里入去,會「低調啲」喎……

睇番上世紀歷史,理想酒店係唔止係男女偷情勝地,80年代唔少名流明星都曾光顧,有人用「理想酒店」呢個term取代「偷情」二字;當年電影成日用「去九龍塘食糖水」同「爆房」交代「行動」地點同行動內容。依家,當然已經不彈此調,你睇《喜愛夜蒲》系列,行動地點已變成夜場洗手間,夠寫實,而且,度度都係「戰場」咁滯。邊等到「理想」?

不過咁好嘅地段,地產霸權又點會放過搵錢嘅機會?原來「理想酒店」都避唔開呢個命運,已經開始拆卸,將改建成為商住酒店,應該都係為自由行服務啦。

「理想酒店」除咗係偷情勝地之外,好多電影都係喺到取景或者會講起「理想酒店」,近嘅就有開宗明義講偷情嘅彭浩翔電影《大丈夫》,喺戲入面陳小春飾演的李醫生說,佢「第一次爆房」就係喺「理想」。而曾志偉就話「理想」嘅位置就最唔理想,暗示「理想酒店」偷情好易比人發現。

然後彭浩翔另一套嘅電影《AV》,講幾個大學生要扮拍AV,佢地喺戲入面就請咗個AV女優天宮真奈美來港,佢哋就話要安排天宮入住全港最理想嘅酒店,就係「理想酒店」喇。

唔講近年,講返91年嘅電影《表姐你好嘢!》,嘟嘟姐同張堅庭押犯人回港,警方都係安排嘟嘟姐佢哋住「理想酒店」,佢哋仲話係「首長級」接待添!就連同樣係91年嘅周星馳電影逃學威龍都有提過「理想酒店」,話說周星馳問細龜住邊到,細龜就先答九龍塘,周星馳再問佢:「住曬啊?」細龜就答:「理想酒店隔籬。」see,「地標」又一例證。

除咗電影之外,都有MV喺「理想酒店」入面拍攝,好似梁漢文同已故歌手陳僖儀,都有喺到拍過MV。

所以話「理想酒店」真係香港一個好重要嘅集體回憶,所以唔少網民聽到「理想酒店」拆卸消息就大嘆可惜,因為除咗少咗個「開房」好地方,仲要係一個回憶再一次畀地產霸權拎走。但市場亦有傳聞指酒店擬出租經營幼稚園。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載