› 選擇地區
三藩市
紐約
洛杉磯
其他美國地區
香港 台灣 北美
 
2013年10月18日

【新鮮娛頭】寸爆袁詠儀指住王晶狂鬧

《最佳女主角》今集輪到敢言寸嘴的袁詠儀,雖然同一題材如點解選港姐、鬧王晶等講完又講,但每次講都令人好想再聽一次。當然仲有…GoGoSir張兆輝!
建立時間 (HKT): 1018 06:00

呢集最佳女主角係袁詠儀,憑一張寸嘴行走江湖,全集半個鐘毫無冷場。三個字:精采絕倫。

90年港姐冠軍出身的袁詠儀,警察世家出身,爸爸、姑媽姑丈、叔叔、表哥表姐,都係警察。小時爸爸同公公最疼她,令袁靚靚可以打橫行:「阿媽就罰到我飛起,因為阿爸太蹤我,但就對阿哥好嚴,因為佢覺得男人係要養家,女仔要嚟縱嘅。中秋節煲臘,兩人都辣親,但阿爸只係打阿哥,我就冇事。」就連公公都好錫佢:「我喺西環街市打橫行,周圍篤穿人哋啲蛋撻。公公叫『高佬城』,佢好高,著住對木屐。平時去飲茶,行過報紙檔,阿公就拎報紙,我就拎本《兒童天地》,就咁行入去0架喇!」

袁靚靚自認,由細到大幾霸道,而且勢力太大,無人可管到佢。「我唔識溫柔,體貼我識,我識照顧人生活,但我唔識溫柔。」一個咁男仔頭嘅人何以走去選港姐?「因為我覺得我靚囉!」靚靚好認真咁答。

靚靚謂,細個嗰陣好多人搵佢拍戲,但一想到拍戲生涯有限,可能只係去到二三十歲,故一味推。「嗰陣有套《飛躍羚羊》,我都份拍0架,做跑手,100蚊一日。副導演問我拍唔拍劇呀,我話唔拍,唔好煩我。」但到1990年,即選港姐那年,靚靚諗法又唔同:「咁多人叫你選,你不去,老咗先選咪太遲?於是我衝入廚房同媽講,我唔想後悔呀,而且我覺得自己都幾靚呀。當時阿爸唔贊成,因為要著泳衣行來行去,我都有諗過0架,但嗰陣去加拿大溫哥華旅行吸引大好多。」

靚靚表示,雖然覺得自己靚,但從未諗過入圍。選下選下覺得自己會拿第二名:「講真,個個都咁靚女,又大學畢業,講嘢又細聲,我只係中學畢業,成日同翁杏蘭佢哋嘈嘈閉,我得個樣0架咋。諗住自己得第二,一心想拍戲。」但之前明明又話嫌拍戲生命太短?靚靚謂:「一入得去選,就要好清晰諗自己條路,唔通入去選,真係諗住做親善大使咩?宣傳香港呀?」

當選後,自信心爆棚嘅靚靚不諱言覺得自己好掂:「第二名都拍戲,我仲坐喺度唔知做咩。後來無綫搵我做《勁歌》主持,我最憎主持,講嘢又九唔搭八,好彩跟雷宇揚做拍檔。」之後開始拍劇喇,做《我愛玫瑰園》主角,處女下海即擔正,佢話當年完全冇壓力:「我覺得自己好好喎,你唔會覺得自己唔好。」

靚靚舉咗個好經典嘅例子,佢話:「當時有燈光師好大聲嗌我,同我講:『你企出來啦,你睇唔到自己俾人遮住啲光咩?』中間梗係夾雜其他語言啦,當時我覺得自己好勇0架,我話:『我識就唔會企起度啦!』我係多管閒事,警察嘛,由小到大,屋企大小事都由我主持公道,我慣咗以為任何環境都可以咁,依家當然識諗。」

就連靚靚處女電影《阿飛與阿基》監製陳可辛,都話袁靚靚好率性,更特別強調自己「我冇前輩包袱」,換言之,當年兩人合作,靚靚應該都好「率性」。靚靚笑道:「好似吳君如咁,佢同番我講,佢話第一次見你,真係想車巴你,冇大冇細,巴啦巴啦!」

但數到最經典,一定係指住導演王晶嚟鬧嗰次。靚靚解釋——又係紀律部隊之過。「佢應承幾點放我走,你知啦,紀律部隊好準時,最多差十五分鐘,唔可以差太遠,唔係我會發癲0架。但次次夠鐘嗰陣都唔放人,啲製片又唔知死晒去邊,你又唔敢走喎,但其他製片等緊。嗰陣我瞓緊,有人走埋黎,細細聲講:『起身喇』,我一起身就鬧啦,應承放人又唔人咩咩咩咩,鬧鬧鬧,望清楚啲先至知係導演,梗係即刻扮扮瞓過啦。」女新人指住導演嚟鬧呢單嘢更成為報章焦點報道,靚靚謂:「通常啲人係指住製片鬧,我就指住導演鬧。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載