蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年10月22日

【電視風雲】無綫《東張》籲員工回家 肉麻對白全披露

無綫要藝人講歡迎已離巢藝人返家。
建立時間 (HKT): 1022 06:00

網上瘋傳頭先7點半《東張西望》節目中,無綫公然要員工講歡迎已離巢藝人返家,仲留埋藝員部聯絡電話。兩位主持人先話:「TVB一向都好重視人材,無論係台前幕後,供大家發揮所長,TVB同事一路都好同心合力,製作好多高質素嘅節目,對於一啲離開咗公司、從事唔同崗位嘅同事,我哋係好歡迎佢哋重返我哋嘅大家庭。」

有藝員於片中話「張開雙手,歡迎你哋返嚟!」,家燕姐仲話返嚟一齊食盆菜。睇番啲片,好多都係今日拍嘅,好似王浩信同陳豪、伍詠薇嗰部份,就係今日活動拍嘅,好多都係hardsell下年TVB有好多新製作,話會珍惜人才呀,超肉麻。

錯過咗睇唔番?依家有得睇。

薛家燕:「最近我都有同好多以前嘅同事傾過,通過電話啦,知道佢哋嘅情況,我都話,TVB嘅大門係隨時為佢哋而開嘅,大家之前合作過,都有份感情。呢個娛樂圈好細,都係一個圈,永遠我哋都係朋友。我有問候佢哋,我問佢哋幾時返嚟,我哋一齊拍劇(下刪五百字)。歡迎你哋返嚟呀,我哋一齊開工,有盆菜食0架好似。一齊返嚟食盆菜。皆大歡喜!」

鄭丹瑞:「最好就係大家一齊返嚟,呢個我哋嘅大家庭,你知依家有好多新嘅製作,新嘅item,咁大家一齊返嚟玩囉。好耐冇見喇,快啲返嚟啦。我請食飯。」

高海寧:「我嚟到TVB呢個大家庭已經五年0架喇,好多台前幕後工作人員都好幫我啦,教識我好多嘢。以前都有好多合作開嘅工作人員都好希望可以繼續合作啦。公司嚟緊有好多好多元化嘅節目出街,希望你哋可以快啲返嚟我哋呢個大家庭。」

王浩信:「嚟緊TVB會製作更多更新更唔同嘅節目俾大家睇,我知道我哋需要更多更新嘅人材投入我哋團隊入面,如果你有經驗嘅,快啲返嚟,同我哋一齊完成呢個任務啦。」

伍詠薇:「TVB好歡迎咁多位舊同事返嚟,我都好歡迎,好想同好多好多唔同嘅舊同事一齊合作。」

陳豪:「我哋已經合作咗好多年喇,真係合作開,大家一齊成長。」又謂:「有個途徑俾佢哋重新投入工作,所以我喺度真係衷心覺得開心。」

《愛‧回家》演員:「TVB大家庭呢,一路都係嘅,好歡迎好多位舊朋友能夠一齊返嚟,同我哋再見面。好希望你哋能夠返嚟同我哋再見面,TVB嘅大門係常開嘅,張開雙手,歡迎你哋返嚟!」
徐榮:「大門係常開嘅,哈哈哈哈哈哈…」
林漪淇:「我哋《愛‧回家》加集,加集就需要好多演員嘅,咁快啲返嚟幫手。」而之前喺微博轉貼鄧特希撐發牌之言論嘅郭少芸,今日都成了《愛‧回家》佈景板,負責點頭,同微笑。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載