› 選擇地區
三藩市
紐約
洛杉磯
其他美國地區
香港 台灣 北美
 
2013年11月11日

【阿叻挑機】 「跪住返屋企」其實係曲線叫人熄電視?

阿叻嘅挑機宣言一出,多咗好多網民話會熄電視,有網民就話阿叻可能係曲線叫人熄電視。(資料圖片)
建立時間 (HKT): 1111 06:00

喺之前國民教育風波嘅時候,譚詠麟就公開高調支持謂香港「一定要有國民教育」,網民大感不滿;而曾志偉因為免費電視牌照事件發言,表明演藝人協會唔參與,係唔想違背屬會宗旨,並謂:「我哋嘅會章係為藝人謀福利,立場好清晰,藝人不涉政。」又指:「我承認最初有個心態係,大家唔提就算,唔想去回應,係因為唔想外界覺得我哋演藝界有唔同聲音、唔團結。」招來外界批評。

福祿壽三星——其中兩個,即係志偉同阿倫都先後發言招狠批,噚日輪到阿叻陳百祥。佢喺台慶綵排期間,開腔講有關網民發起1119台慶夜熄電視行動,就自信爆棚咁話:「如果可以熄到得番兩、三點(收視),我就跪喺度,一路由將軍澳跪返屋企啦!」

此言一出,惹嚟無數咁多網民勁插佢,有人就話:「又要威又要戴頭盔,係人都知唔會得兩三點收視0架啦,有種就玩大啲!!」其實講得都冇錯,因為要做要兩三點收視,真係好難。就算成個九龍停電,都未必可以令無綫得番兩點收視。而且,無綫計算收視法係於全港搵約800戶家庭,安裝紀錄儀作點算。除非呢800戶都熄電視,否則根本冇可能令阿叻「跪住返屋企」。

而且,再望一望亞視都知,到今時今日亞視都仲未可以全線「0」收視,大多數都係keep住1點,何況係無綫?而且當中有好多人係開住部機唔睇。收視點數唔係由全港市民計算,所以根本冇乜可能得番兩、三點,所以有網民就質疑阿叻:「點解唔話11、12點就跪?」

而另外就有網民有其他嘅觀點,佢哋話其實阿叻係支持熄電視嘅行動,只係用咗一個「曲線」手法,呼籲大家熄電視。咁講又並唔係冇可能喎,因為阿叻發表「挑機宣言」之後,多咗好多網民都話會熄電視,就連有部份都話,原本冇打算熄,0依家就一定熄,仲有一部份網民就話,一定會熄,因為阿叻跪返屋企呢個節目,好睇過台慶喎。

至於到底阿叻係真挑機定係曲線叫人熄電視,就真係冇人知,剩係知道喺台慶當晚,因為阿叻,真係多咗人熄電視。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載