› 選擇地區
三藩市
紐約
洛杉磯
其他美國地區
香港 台灣 北美
 
2013年11月26日

【世界級,又如何?】 內地政府收地張敬軒五千萬錄音室要拆!

張敬軒與團隊花了不少心血打造嘅世界級錄音室TheVillageStudios,因為政府要收地,故只是用了四年的錄音室要拆,令人惋惜。 (資料圖片)
建立時間 (HKT): 1126 06:00

張敬軒用咗成五千萬港紙喺廣州成立嘅世界級錄音室TheVillageStudios,因為畀政府收地,所以兩年內會清拆。軒仔今日出席港台十大中文金曲記招時,一臉落寞謂:「其實知道咗幾個月,呢輪拆到埋嚟喇,附近嗰啲都拆晒咁滯。其實一路都有同政府交涉,政府有賠償,賠足嘅,賠番成本,我唔會收足佢,因為我哋每年都有折舊0架嘛。」

至於會否再開?軒仔就話內地政府其實俾咗兩個offer佢:「一個係俾番錢你,你自己諗下會唔會再做,另一個方案係喺廣州市再撥一塊地俾我,搬運同裝修就係政府俾,但hardware就冇得賠嘅。因為呢個錄音室我真係擺咗好多時間落去,我甚至停埋幕前工作去搞,所以…我諗我有生之年都唔會再搞同樣咁大規模嘅錄音室,所以我諗我哋係會接受政府嘅賠償。」

諗番起之前軒仔就係為咗呢個錄音室超支而同契爺牆紙大王陳鼎禮決裂,估唔到依家錄音室又話要拆喇。軒仔話:「冇呀,因為我後買番晒呀嘛,我自己全資。」有記者即笑言:「嘩,你咁多錢0架!」軒仔即謂:「咁又唔係,有技巧處理,我諗最多都係賠六七成左右。我哋開咗四年,計番折舊率;同埋如果真係唔做嘅話,有好多手尾要跟,好似遣散咁。」佢話依家有轉機,因為啱啱有一半嘅地,政府規劃係教學用途,而錄音室都係一個錄音學校,有課室,有足夠教學資源,但政府計劃中就plan嗰塊地嘅另一半用途係興建變電站,軒仔依家就觀望緊政府會否為咗呢個「教學用途」而將變電站起遠少少。

其實軒仔呢個錄音室,真係世界級,入圍世界二十大錄音室,咁當初起嗰陣,又知唔知會俾政府收地呢?軒仔話:「當初個業主有提醒過我哋,係有風險嘅,但你知喺內地,一個project起碼都要十幾年(咁你真係唔好彩?)又唔係嘅,如果錄音室真係唔做,我會將設備搬番嚟香港,因為呢啲設備,之前CelineDion、WhitneyHouston錄音用過,都係好有歷史價值。」咁啱依家香港政府話要活化工廠大廈,軒仔話睇下有冇得傾喎,將商營錄音室變成音響技術學校,用嚟做教學,都係好事。兩年內會有定案。

問軒仔可有計過自己今次蝕幾多?佢諗一諗然後話:「蝕幾百萬囉。股本係幾百萬,蝕咗心機囉。」

而最近黃貫中在網上自爆家暴,叫佢老竇唔好再打佢阿媽同老婆朱茵,仲話佢因為情緒不穩,所以唔做電影《末日派對》嘅宣傳。一齊合作拍戲嘅謝安琪話有留意新聞,都有傳短訊慰問阿Paul,佢話:「不過佢冇覆,可能要時間清靜下,希望佢快啲冇事。」

TheVillageStudios更多圖片:
http://www.hinscheung.cc/viewthread.php?tid=6322&extra=&page=1

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載