蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年12月07日

連詩雅為RestInPiece道歉: 俾身邊嘅人笑咗幾日

連詩雅同佢師兄大文豪真係有得揮,頻頻喺社交網出事。
建立時間 (HKT): 1207 06:00

連詩雅(Shiga)日前被發現於instagram悼念男星PaulWalker寫上「RestInPiece」遭網民恥笑,點知無耐再俾網民刮返今年因車禍逝世嘅陳僖儀嘅葬禮紀念冊上面,Shiga同樣係寫上「RestInPiece」,令人懷疑佢究竟識唔識「RestInPeace」正確寫法。

噚晚連詩雅出席電影《風起了》喺銅鑼灣舉行嘅首映禮,一臉誠懇咁道歉:「今次真係好唔好意思,真係好大懵,又唔止一次啦,對唔住佢哋兩個,如果呢件事令到有人唔舒服嘅話,都想講句對唔住。」佢仲話:「我都俾身邊嘅人笑咗幾日,可能第一次寫錯咗冇留意,所以咪再寫多次,下次再留言嗰陣,會小心check多幾次,我明白自己係藝人,會有人留意,我都好忟自己點解咁唔小心!」

在旁嘅「大文豪」周柏豪就以「過來人」身份話:「經驗之談啦,慢慢就慣o架啦。」

問Shiga係咪一路都係咁寫法?佢話:「其實我識嘅,因為我第一次寫錯咗之後又冇察覺到,咁可能第2次又手快快咁再寫錯,平時我都會留意spelling(拼字),但會依賴電腦嘅autocorrect...今次真係自己手快快打錯,好唔好意思。」

問覺得唔覺網民啲回應好刻薄?以後又會唔會寫返中文?佢話:「中文更加錯得緊要,今次真係我自己寫錯字,都明白,最緊要自己以後知道要小心。」

同場嘅周家怡被問有冇留意「雙王會」,佢話:「我都係睇報道先知,不過佢哋會唔會只係食飯咋?我覺得無論係任何形式,只要可以令港視繼續運作,都係好事。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載