蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年01月29日

【錢從何來?】民建聯請街坊睇《六福喜事》啲錢又去咗「幫港出聲」?

又「幫港出聲」又「民建聯」,黃百鳴好想入建制派乎?
建立時間 (HKT): 0129 06:00

就嚟新年,賀歲片有咩好揀呢?一係睇「雞」(《金雞sss》),一係睇馬騮(《大鬧天宮》),如果想「幫港出聲」,可以考慮去睇《六福喜事》,事關導演黃百鳴當日話28號(即係噚日)舉行嘅首映係為「幫港出聲」籌款嘅。

黃百鳴當日話支持「幫港出聲」「反佔中」嘅理念,話中環好似一個人嘅心臟一樣,係唔搞得嘅。好多網民聽完,都話發起罷睇《六福喜事》,黃百鳴之後受訪話:「支持佢哋好大罪咩?」聲言唔怕網民罷睇。

睇嚟黃百鳴真係唔驚網民,因為佢套戲噚日正式上畫賣飛,出現好多靈異現象,就係好多間戲院賣噚日嘅優先場,個個位都唔揀,係揀正螢幕前第一行,仲要唔止一個,係成排觀眾好齊心咁買晒第一行嘅飛,呢班觀眾,真係唔怕大近視。

原來呢班觀眾,有可能係「清貧人士」同綜援人士,有市民就見到民建聯中西區區議員陳學鋒嘅辦事處通告,搞咗個「電影戲票贈弱勢社群」,當中就派發《六福喜事》戲票,兩埸都係尖沙咀TheOne放映,分別係上午9點及下午4點,早前黃百鳴講明28號嘅首映係為「幫港出聲」籌款,但依家啲飛又去咗民建聯嘅議員辦事處派,咁又點籌款呢?

如果呢個場次由議員辦事處埋單,議員辦事處啲錢邊度嚟?咪又係公帑,即係納稅人嘅錢...然後啲錢又捐咗去「幫港出聲」,咁即係點?即係黃百鳴慷香港人之慨反佔中?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載