› 選擇地區
三藩市
紐約
洛杉磯
其他美國地區
香港 台灣 北美
 
2014年02月17日

被爆戀23歲「翻版樂基兒」 黎明現身風騷笑不停

攝影:黃偉雄
建立時間 (HKT): 0217 06:00

今日本報披露黎明同樂基兒(Gaile)離婚後,終於搵到新女伴,女友年約23歲,係模特兒,個樣仲有啲似Gaile。消息指黎明係喺一次朋友聚會認識女方,可謂一見鍾情,之後展開熱烈追求,終贏得美人歸,更特別安排女友入住保安嚴密嘅西九豪宅天璽。

戀情曝光後,咁啱黎明今日到尖沙嘴出席「香港影視娛樂博覽」,黎明以香港影視娛樂大使身份現身。身穿藍色衫嘅黎生心情唔錯,全程笑容滿臉,非常風騷,但大會就以趕時間為由,表示黎明不會受訪。

期間黎明都有上台分享,司儀問佢第二年擔任大使感覺如何?黎明又拋出金句話:「第一次第二次第三次同第四次,冇咗之後返嚟第一次,冇都唔緊要,最緊要係香港娛樂圈一份子。每一個各行業,香港嘅最大特色都係,我哋嘅地方比較細;我哋轉變同轉數比較快,所以呢個優勢喺唔同環境、時代吸收唔同知識,幫我哋自己嘅娛樂圈及社會環境作調較,接到大世界嘅齒輪。」明唔明?其實只要將啲虛詞刪咗,將啲句子、詞語調一調,就明。

再問黎生,究竟香港最大優勢係乜?黎生話:「頭先都講咗,香港優勢其實係細,但係犯咗錯都可以好快矯正,做得唔夠好或者唔好,容易調較到,最緊要個腦比較開放啲,接受大世界成個齒輪點行。如果接唔到,細都有好處,可以慢慢改,唔會咁易俾人發現。」同樣,其實調一調啲字眼,都係明嘅。

黎生走嗰陣,想搭電梯上去停車場啦,點知上到一半電梯壞咗,黎生要拾級而上,但未有影響其心情。唔通呢啲就係愛情魔力?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載