蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年04月01日

盛傳公司「紅色」背景 天堂鳥披露資金來源:銀行囉!

問天堂鳥究竟你公司係咪紅色背景,資金來源喺邊?佢哋竟然答係「銀行」。 
建立時間 (HKT): 0401 06:00

日前MK-PopFAITH去咗尖沙嘴星光大道舉行處男街頭騷,結果同一晚,香港就落雹兼黑雨。…FAITH同落雹當然無關連,但至少,會令人記得呢一天。

咁同屬MK-Pop嘅天堂鳥又點呢?拿拿拿,佢哋今日就去咗新城,宣傳《登陸太陽》。FAITH就話得一首《StopPeeping》,但天堂鳥已經話錄緊第二首歌,今個月見街喇。

之前有Blogger「獨樂樂」於其著作中表明:「天堂鳥背後的創富文化集團是入侵香港娛樂產業的紅資機構,他們借香港地址入市,在香港培植藝人,以『本土音樂』自居,用『本地製作』等衍詞誤導香港人……」仲講到殖入思想洗腦咁嚴重。

事實上呢間「創富文化集團」個老闆名莊戰,當年離開TVB後創立金融公司「創富環球」,更涉足舞台製作、地產、保險、旅遊、移民等業務,但金主神秘,下年主板上市。而旗下得四「組」藝人,其中一個係杭州人,一個係陝西人,且不時出席香港一啲「愛國愛港」活動,「紅」到不得了。

今日問番天堂鳥關於公司疑有紅色背景,三子就話:「呢樣真要澄清番,我哋公司係香港公司,老闆亦喺某電視台做過,絕對係香港0架囉。」咁資金來源呢?三子你眼望我眼,然後爆咗一個大家都估唔到嘅答案:「銀行囉!」銀行?你想講提款,定係話公司向銀行借錢呢?

三子話:「銀行囉,不過就唔知邊間銀行,下次食飯問下。」哦。問佢哋點睇自己被封MK-Pop,三子話:「MK都係香港一部份,又係香港中心點,所以都幾好。」至於同期出道嘅FAITH,天堂鳥話都有留意對,但就唔想比較置評。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載