› 選擇地區
三藩市
紐約
洛杉磯
其他美國地區
香港 台灣 北美
 
2014年04月03日

【短片】【收買人命】江美儀三日踩近60小時疑爆肺?無綫催佢返工

江美儀連續三日開廿個鐘頭工,最後都病倒。(資料圖片)
建立時間 (HKT): 0403 06:00

無綫本來搵影帝梁家輝演新劇《使徒行者》,不過因有傷患而辭演。之後森美拍拍下又因病為由辭演易角,沈震軒拍此劇時又炒車致右手骨裂,兩隻手共鑲咗三粒螺絲。呢套劇似乎同傷患好有關連。今日有報道再話,有份演出嘅江美儀,因連續三晚通頂拍戲,喺上月20日懷疑爆肺,要送院治療,之後返咗屋企休息,陳敏之曾去探病。

據知,嗰排江美儀連續三日,每日開近廿個鐘頭工。病發當日,江美儀下晝返屋企沖涼後返廠時,工作人員見佢面青青行路又腳浮浮,繼而話心口痛抖唔到氣,之後要去醫院檢查,醫生懷疑係爆肺,要佢住多兩日醫院check真啲,但報道引述知情人士話江美儀唔想件事揚開,於是決定返家休息,但劇組想4月拍晒,於是打俾佢催返工,仲話同劇嘅佘詩曼、林峯催開工,所以日前江美儀已經復工。

上月24日,江美儀於微博寫道:「因為上星期咳嗽太勵害,咳傷了肋骨之間的肌肉,很痛很痛,到現在已經好很多啦,但就是說話要很輕,做什麼都要慢慢的,整個人都變得溫柔啦!沒有告訴你們就是怕你們擔心囉!」翌日再發微博謂:「上次《使徒行者》的開鏡拜神因為病倒了未能參與,心感可惜!今天我們再舉行多一次,希望這劇台前幕後所有工作人員都能拍攝順利平安幸福!」

該報道並致電江美儀求證此事,佢就話:「我喺2月25日發燒、由喉嚨痛,之後開始咳,咳到心口痛,醫生懷疑我爆咗肺,依家講嘢都辛苦唔可以咁大聲。」睇番佢個微博,早於2月27日,已寫道:「身體不適在家休息了兩天,最後都係要入醫院!唉!下午發燒發到暈陀陀,但又見凍,所以就入醫院睇下囉!醫生話係喉嚨發炎引至中耳炎發燒到101度幾,打咗針退燒啦,而家已經喺屋企,要休息三日!好辛苦呀!大家真的要好好保重身體啊!」3月12日,已見一臉疲態嘅江美儀貼開工相,當時係晚上十點。

3月13日,凌晨6點44分,江美儀再貼圖寫道:「你現在能看到這照片,表示你已經起床,準備上課和上班,但我相信,也有人像我一樣剛收工回家,準備去睡覺吧!不論如何,希望你們都有美好的一天!早呀!晚安!」!3月16日,江美儀又貼圖,以愛犬「代言」:「我很累,累得拖鞋還沒脱就睡覺了!晚安囉!」真係陰功。

江美儀於訪問中,又透露遲啲有場汽車爆炸戲,希望呢幕可以延期拍。而佢仲話由舊年到依家拍咗三套劇,希望拍完呢套劇有得抖下,拎80日大假休息叉電。

另外,近日喺微信出現一條訊息,訊息內容謂有人話聲稱自己係「江美儀」,話出咗意外急需要錢幫,而今晚美儀就喺微博到澄清,話呢個人唔係佢:「各位朋友,我並沒有出什麼意外,也不需要錢應急,這在微信的人並非我本人,請大家小心!謝謝!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載