› 選擇地區
三藩市
紐約
洛杉磯
其他美國地區
香港 台灣 北美
 
2014年04月09日

【短片】思思‧馬子妮‧Alex做完《愛‧回家》就冇得撈喇!

(左起)朱慧敏、湯洛雯同蔣家旻,有傳拍完《愛‧回家》之後,冇得加入原班人馬嘅新處璄劇。(資料圖片)
建立時間 (HKT): 0409 06:00

無綫嘅處境喜劇《愛‧回家》,播出超過兩年,喺呢套劇嘅演員個個都紅晒,其實都好正常,話晒一個星期有5日,打開個電視都會見到佢哋,所以無綫嘅高層有見及此,喺《愛‧回家》做到600集收工之後,就會用原班人馬開新嘅處境劇……即係「新《愛‧回家》」啦!呢班演員仲唔豬籠入水?但係就唔係個個都咁好運,近日有報道話,《愛‧回家》入面,其中有啲演員,已經畀曾勵珍(珍姐)落令革走。

報道就話舊年珍姐開咗個檢討大會,公然咁鬧爆林漪娸,再之前因為趙永洪嘅態度懶散,一早就畀人踢咗出局。但原來珍姐心目中,仲有三位人選要革走,分別係Alex朱慧敏、馬子妮蔣家旻同思思——湯鎮業侄女湯洛雯。其實佢哋三個嘅實力如何,大家都有目共睹,但呢個就唔係佢哋畀革走嘅原因,主要都係佢哋性格嘅問題。

先講思思湯洛雯,佢一出現,已經深受一班網民(尤其高登仔)嘅歡迎,又話佢靚女又有腳睇,真係好吸引咁話,但就係因為佢咁受歡迎,所以報道就話佢嘅罪狀係「未紅先驕」,對同事成日黑口黑面,態度囂張,而有工作人員就話:「珍姐最忌人未紅先驕!所以湯洛雯不但冇份入新劇,《愛》劇未完就已經被叮走。」

而Alex朱慧敏曾經都畀人轉去做閒角一段時間,當時都係話佢成日「教」導演拍戲,又「教」對手做戲,所以日日都同人嘈交。舊年佢行為良好,所以就加番重佢嘅戲份,但係報道就話佢故態復萌,高層已經落令「用完即棄」,有無綫人就話:「佢同黎諾懿嘅感情戲係劇中主線,所以呢段時間唔可以再將佢打入冷宮,等新一輯先踢佢走。」

至於馬子妮蔣家旻,報道就話佢因為拍過電影《第一次不是你》做咗女主角,仲獲提名金像獎最佳新演員提名,就以為自己好勁好有料,仲畀珍姐發現佢工作態度麻麻,知情人士話:「原本佢都有感情戲,但珍姐知道佢根本冇心做,所以删咗佢啲戲。」

網民對呢件事嘅反應,都好一致,總括嚟講佢哋嘅意思係,就係蔣家旻應該踢走,但如果踢走咗朱慧敏同湯洛雯,就可以以後唔使再睇《愛‧回家》,名正言順熄電視。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載