蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年04月11日
馬上成為壹會員

【短片】星爺新戲搵女角要上酒店房面試?

喺微博,有人話星爺嘅《美人魚》召募女角,仲叫啲女仔上酒店房面試。
建立時間 (HKT): 0411 06:00

周星馳喺《西遊.降魔篇》拍續集之前,會先開拍一套3D科幻愛情大片《美人魚》,呢套戲喺兩年前,星爺就想開拍,劇組都簽約埋班,仲搵埋世界小姐張梓琳做美人魚,但當時資金出現問題,所以拍唔成,但近期呢套戲有傳喺6月中開拍,但係張梓琳都做埋人妻,星爺就要重新再搵過新嘅美人魚,有傳仲會喺網上公開召募女角。

喺噚日,微博上有一個叫做王穌連嘅人,就貼咗一段說話:「周星馳導演作品《美人魚》北京籌備地址:糊塗賓館805房間,8月深圳開機,眾角色未定。女演員面試要求:素顏見組。要求新人,清純可愛,楚楚動人,要求新人,富家千斤,氣質高貴。」大家睇呢段面試公告,係唔係覺得有啲古古怪怪咁呢?

網民覺得第一奇怪嘅係,點解要上房?仲要係805號房,會唔會太怪異,以星爺喺內地嘅號召力同威力,話要召募演員,只少有一千幾百人,一間小小嘅「糊塗賓館」805房,可以容下咁多人?

第二古怪嘅係,剩係得女角?呢點都可以理解,套戲講到明係《美人魚》,一聽就知係要女角多過男角,但都仲有奇怪事,就係個條件:清純可愛,楚楚動人,氣質高貴,呢三個都可以理解,但係富家千「斤」係咩意思,相信應該係佢打錯字,因為國語個「金」字同個「斤」字好似,如果打拼音嘅話真係好易打錯。但問題係,點解做演員要係一個千金?而四個條件入面,竟然冇一個同演技係有關係。有網民就話以上嘅條件唔似係一個做演員嘅條件,而似召募女朋友嘅條件囉。

仲有一個叫做陳震宇嘅人喺微博寫道:「《美人魚》現已在深圳龍崗區君逸酒店707房間籌備,地鐵塘坑下,眾角色未定,歡迎見組。」又喺一間房入面面試?會唔會真係太細呢?

陳震宇於微博表示佢係周星馳旗下上市公司,比高集團控股有限公司嘅業務總監,佢喺4月2號於微博寫道:「有關所有電影《美人魚》的對外群演招募、橫店拍攝等等,均為假消息,請大家千萬不要被騙!群演/劇組招募等日後可能會有,但肯定不是現在。另外100%不會在橫店拍攝,這是現代片............」但之後過咗一日,佢又話:「經我深入瞭解後,橫店的群演招募竟然是真的,大家趕緊去吧。」

之不過,本報記者向星爺求證此事,答案係:假嘅,並無此事。各位小妹妹,千祈千祈唔好上當呀!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載