› 選擇地區
三藩市
紐約
洛杉磯
其他美國地區
香港 台灣 北美
 
2014年04月11日

【短片】【請廣傳】蘇施黃開咪發po唱衰酒店 網民反轟阿蘇:丟盡香港人的臉

蘇施黃今日分別於電台同fb專頁開咪,仲講明「請廣傳」,怒轟酒店收佢6個茶包嘅錢。
建立時間 (HKT): 0411 06:00

【請廣傳】,係蘇施黃自己講0架!

名人明星要發表意見或者投訴,透過互聯網就可以,而且影響力夠大,有啲仲可以用埋佢哋主持嘅電台/電視節目去「抒發」,或者投訴。好似蘇施黃咁,佢噚日喺禮頓道CrownPlaza有「奇怪」遭遇,咁當然係不快事件,結果佢唔止喺電台節目大肆撻伐,更於fb專頁上圖文並茂,寫住「請廣傳」。

蘇施黃喺fb專頁寫嘅po,內容係一張單據,並寫道:「[請廣傳]cheap精香港禮頓道CrownHotel(CrownePlaza)!!!」

「事情發生在2014年4月10日。和家人打完邊爐,我提議去飲杯嘢一行6人去了銅鑼灣禮頓道的CrownHotel(留意單右上Gst6,即6位).我和姐姐和另一朋友叫Englishtea,我話要濃一點,要兩個茶包。兩分鐘後蠢侍應xx就對我話:『要兩個茶包都收兩杯的錢...經理都係咁話。』我答你敢收就得嘞!」

「看單!你們真的敢收了6杯Englishtea共$330!我唔廣傳CrownHotel的cheap精惡行真對唔住自己。茶包一個值幾多錢呢,三個茶包就立即可以損害你的聲譽。」埋單$588.5,咁當然唔止係6杯Englishtea,仲包括檸檬茶同咖啡及一杯紅酒。

蘇施黃咁火,仲話明「三個茶包就立即可以損害你的聲譽」,又形容侍應係「蠢侍應」,似乎寫呢個po嗰陣餘怒未熄。睇佢張單,應是銅鑼灣皇冠假日酒店28樓嘅Club@28。

但網民就唔係咁睇,有人留言道:「人地都講到明加多個茶包係收多杯錢,你都重落order就係你問題啦!」、「話服務員蠢??人哋打工唔聽上頭講唔通聽你講咩!投訴酒店不變通係應該嘅,但我覺得你應該收回對xx的蠢字及向佢道歉囉,做人要公道啲囉!」

其他網民留言:
「去飲野唔睇MENU,埋單先話佢收得貴。不如你自己帶盒茶葉/茶包,叫佢俾杯熱水啦。再唔係你去7-11買三罐雀檸囉。」
「半島奶茶都好似收過我125,$55一杯咪算平!」
「如果EnglishTea係一包茶包收一位價錢,試問若果我一個人去飲EnglishTea但我也嫌啲茶唔夠濃,我要夠6包才滿意,但又不停叫侍應加水。請問我是否真的只給一位錢?真的合理嗎?」
「唉…這就是香港投訴文化!」
「酒店嘅Englishtea是用set計,唔係茶包計,英式紅茶係英式茶包兩個浸壺,奶、糖,額外茶包另上,再加濾茶渣工具。所以係不存在茶包幾多個的問題。」
「我係waiter我一定要聽boss講,你係特首、係國家主席都會收錢。High個Englishtea都知重點係紅茶,奶係配角,你覺得茶葉唔值錢係你問題。」

本報曾致電CrownePlaza查詢,但至今暫未回應。至於蘇施黃個專頁亦未有刪除網民留言。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載