› 選擇地區
三藩市
紐約
洛杉磯
其他美國地區
香港 台灣 北美
 
2014年04月16日

張慧儀帶養子睇首映 陳友爆太太有腫瘤

張慧儀噚晚帶埋10歲養子Hanson(左圖);而陳友就話太太去年經歷,令佢信咗主。(攝影:溫敏芝)
建立時間 (HKT): 0416 06:00

張慧儀噚晚帶埋10歲養子Hanson,同埋張可頤、陳友等,出席福音電影《真的有天堂》嘅首映,不過慧儀見有傳媒在場就一臉驚訝,佢話:「我好少帶養子出嚟,唔知現場有咁多記者。」

《真》片當中一幕關於小朋友面對死亡的戲份,佢就話就算兒子睇呢一幕都唔使擔心,因為只要家長作出正面輔導,就冇乜問題。

講到佢要照顧囝囝,又要兼顧飲食生意,佢話囝囝返學嘅時間,就可以做自己嘢,不過到放學就要做返媽媽嘅責任,雖然係攰啲,不過每日過得好充實喎。同場嘅張可頤就露腰,仲話自己練緊馬甲線添。

至於失落金像獎男配角嘅陳友,就話太太舊年嘅經歷令自己信主,佢話:「上年5月太太喺美國返香港去按摩,點知按完發現斷咗肋骨同盤骨。醫生話可能係肝癌入骨,最多得幾個月命,係我人生最低潮。呢個時候蔣麗萍叫我祈禱,我用咗一生人最虔誠嘅心去祈求,就算有過乜罪都寬恕我。」

之後佢再陪太太睇醫生,就得出另一個結果:「原來個病係多發性骨髓腫瘤,骨髓有變異,侵蝕咗啲鈣,有方法醫好個病,過程就好艱苦,不過0依家老婆咪等緊我返屋企食飯囉。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載