蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年05月18日

【林建岳嫁女】林恬兒、何正德世紀婚禮

完全係一個世紀婚禮!(攝影:陳慧安)
建立時間 (HKT): 0518 06:00

林建岳與前妻謝玲玲所生嘅29歲長女林恬兒,與全國政協常委兼星島新聞集團主席何柱國嘅32歲兒子何正德,上月28日已於法國南部尼斯大搞世紀婚禮,一對新人今日於灣仔君悅酒店舉行結婚酒會。

一對新人應傳媒要求做咗三次訪問,新娘林恬兒穿上早前法國婚禮穿過、逾7位數字嘅ChristianDiorHauteCouture高級訂造婚紗,明艷照人。新娘子笑謂今日好開心,新郎就話:「啱啱結婚,梗開心。」至於會否快快造人?林恬兒表示:「事業為重,隨緣,順其自然,有就開心。」又表示家人冇俾壓力。問新郎哥想生仔定女?佢就話:「仔定女冇所謂,最緊要健康。」

林恬兒又大賣口乖,話老爺奶奶好好,為是日酒會幫咗好多,令新娘子輕鬆不少。咁奶奶有冇講入門家訓?林恬兒就話:「講真,未嫁前佢哋已經當我係女,一路教導。(教乜?)樣樣都教,老人家講就要聽。」

至於老爺奶奶送咗乜嘢?林恬兒笑謂:「呢啲唔好講喇,老爺奶奶送嘅最好禮物,就係一個咁好嘅婚禮同咁好嘅老公。」講到度蜜月,何正德謂:「蜜月遲啲先,世界好大,好想地方想去,慢慢嚟。」林恬兒就話想睇波,應該七月去巴西睇世界盃。

問何正德有何驚喜送俾太太?佢話:「每日都一齊已是驚喜。」

至於點解選擇喺法國一家酒店舉行婚禮?恬兒就話,8年前同爸爸(即林建岳)去康城影展,入住該酒店,因而愛上;咁啱今次又搵得番嗰間酒店,故此就揀咗喺嗰度行禮喇!咁婚後是否要太太唔使做嘢呢?何正德笑言:「佢鍾意做,就支持,最緊要佢開心。」

至於嫁女嘅謝玲玲受訪時就謂,當初女婿同佢確定婚禮時,確有不捨,仲流淚,但依家就好開心:「搵到個咁明白,愛護,錫佢嘅,好欣慰。親家對我個女無私的愛,已經無所求。」問佢係咪俾女婿100分?謝玲玲表示:「無價,最緊要佢哋相知相愛。」講到抱孫,謝玲玲表示順其自然:「做媽媽就想快啲,好多嘢唔係我控制到,佢自己識諗。」謝玲玲又笑言冇傳家之寶,但已送首飾俾恬兒出嫁,早於法國舉行嘅婚禮上亦已戴過綠寶。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載