蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年07月18日

【短片】陳茵媺為BB送走愛貓招狂轟

建立時間 (HKT): 0718 06:00

陳茵媺噚日出席活動時,分享佢同貓貓嘅緣份。茵媺透露,佢當年隻身來港工作,加上又愛貓貓,故雖然對貓毛敏感,眼耳口鼻會敏感變腫,亦寧願長期食藥,而收養咗三隻貓陪伴。但懷孕後因為唔能夠食藥,故只能忍痛割愛,將養咗六年嘅貓貓送俾好友代為照顧。

訪問中,茵媺表示曾想過等囝囝大個啲之後,再接番貓貓回家。不過佢又有另一個憂慮:「佢哋喺朋友屋企住得好開心,突然帶佢哋返屋企,都係對貓貓唔公平。」

茵媺並謂,若然再領養小動物,事前會帶囝囝去做檢查,睇下會否對動物毛髮敏感,免得惹上哮喘。但這則報道,今日卻引來不少網民爭議,非牟利獸醫診所創辦人麥志豪更直斥茵媺呢種想法反映人對動物嘅過份恐懼,認為人面對任何事都應多求證,尤其是對待生命。

不少網民都留言狂轟陳茵媺,指其對生命不尊重。也有人留言謂:「羅敏莊養有七隻貓。她生了小朋友,卻沒有將貓放棄。自私無知就晤好找籍口。若真為孩子著想,根本就不應該在香港帶孩子。」、「明知有敏感,要食藥,咁嚴重,仲要養三隻。一開始就唔應該養呀。無論任何理由,阿媽為仔幾偉大都好,安排得幾好都好。棄養就係棄養。無得抵賴。」、「醫學已證實過好多次,小朋友與毛小孩一同成長可增加小朋友的抵抗力;而致敏原亦不一定是動物毛,作為家長的,為何未了解清楚便肯定寵物對你的寶貝不好?」

其實同屬愛貓之人嘅田蕊妮,都患有鼻敏感。老公杜汶澤想養貓,但阿田就擔心未知自己能否俾佢快樂。但經過阿澤苦心安排同做足功課,亦問過醫生意見,最後阿田克服咗鼻敏感,更將Momo視如己出:「唔好因為冇兒女就養寵物嚟衝擊一下生活,要有耐性、責任心,亦要有信心俾佢哋開心,佢哋能夠嚟到呢個家,亦係緣份。」

也有網民謂,茵媺並唔係因為生咗BB之後、先決定將貓貓暫寄居友人家,而係陀B嗰陣因為唔可以繼續服抗敏藥,故只能忍痛割愛。之後茵媺亦有諗過接番貓貓回家,但見貓兒喺新屋企同新主人相處得好好,故最後亦不忍心要佢哋同新主人分離;茵媺亦有於訪問中謂,將來如果再領養貓貓,會帶囝囝去做檢查,睇下會否對動物毛髮敏感,免得惹上哮喘。

有網民寫道:「佢係加拿大的時候還有幫助流浪貓,回港後也有帶生病的貓貓去睇醫生,可惜那隻貓咪已經過身,當時Aimee好難過。我們是fans也知道她一直有敏感!⋯我作為她的粉絲,也覺得她作為公眾人物,這樣的新聞不好,但她冇辦法。」

其實無論點都好,養動物是一生一世的事,不應因為寂寞或貪得意而決定養貓貓或狗狗,而是給牠們一個家。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載