蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年09月16日

【短片】【慘!】患「貝爾氏麻痹症」 官恩娜右邊面郁唔到

(攝影:馬建華)
建立時間 (HKT): 0916 06:00

官恩娜(Ella)同薛凱琪(Fiona)今日喺中環出席一個品牌慨念店開幕活動,Ella滿懷心事出活動,拍照期間仲目無表情,經旁人提點先勉強笑一笑,轉頭仲見佢流淚。

Ella接過助手遞俾佢嘅紙巾印眼淚後,佢用手指一指右邊面話:「我呢邊面o依家唔郁得,係上個禮拜嘅事,起初以為中風,好驚,當時男友陪睇腦科,睇咗腦科,醫生話有條腦神經線有問題,連隻眼都眨唔到!」佢亦解釋頭先流眼水係因為俾閃燈不停閃隻眼,不過Ella仍然堅強話:「I'mOk!」

經過醫生診治後,Ella證實患上貝爾氏麻痺症,佢話:「照咗係第7條神經線有事,我o依家食緊高劑量嘅類固醇,同埋用人工淚水,但係夜晚瞓覺要手術膠紙痴住隻眼,如果唔係合唔到隻眼,瞓唔到。」Ella繼續解釋:「醫生問係咪休息唔好?我話唔係,可能係感冒發燒,菌入咗神經線,加上屋企有啲唔開心事,個到心情好忐忑。」問到目前情況係咪樂觀?佢話:「都可以,因為唔係致命,o依家keep住食高劑量,把聲好咗,但係用嘴唇發音嘅字講唔到,講嘢嗰陣要用力郁肌肉,搞到個頭啲肌肉有啲痛,醫生話有啲人一個月郁得番,三至六個月痊癒,」佢亦大讚男友好好:「佢成日都陪我去睇醫生,夜都有照顧埋我,今次我有好深體會,做人今日唔知聽日事,要珍惜生命!」

同場嘅Fiona話唔知道Ella有病,所以轉頭先問候,佢亦透露自己身體向來麻麻:「我身體有私人病,長期Keep住睇兩個醫生,一個係印度治療法嘅醫生,另一個係定期去北京睇中醫!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載