蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年09月20日

【祖名涉毒】新戲冇成龍洪金寶:等佢靜一輪先

建立時間 (HKT): 0920 06:00
(攝影:仇志德)

洪金寶籌備多時,自導自演嘅電影《老衛兵》,正喺俄羅斯城巿海參崴進行拍攝,劉德華、麥嘉、石天、徐克、元秋及元華等七小福都會助陣演出,而洪金寶太太高麗虹、二子洪天祥同女友、細女洪煦榆都去到海參崴探班,太太高麗虹更全程陪伴在側。洪金寶去到俄羅斯,出入片場都有影迷等候攞簽名影合照,大哥夠晒親民有求必應。

洪金寶話《老衛兵》仲有10日嘅拍攝工作就完成,劉德華聽日會飛抵當地入組拍攝,洪金寶說:「我哋有動作、追車等戲份,華仔聽日拍被人追。」洪大哥指當地政府好支持電影拍攝工作,政府人員同警察都有到場協助封路拍攝,劇組預計會喺當地多拍5至7日。洪大哥笑指自己只有牀戲,每日早上6點起身拍戲,未有太多動作戲份,對於今次再自導自演,洪金寶說:「唔係辛苦,係好辛苦,之前病咗係咁啱啫,已紅好番9成9。」洪金寶笑指除咗佢,劇組眾人都要靠太太湯水保身。今次洪金寶碌盡人情咭搵老友客串,佢話:「碌人情卡,搵咗華仔、麥嘉、石天、徐克等,徐克做幕後嘥咗佢,佢做幕前好得意。」

洪金寶話:「成龍原先應承咗,但係喺祖名出事之前已經話唔得,因為要搞佢自己啲戲。」對於有否關心房祖名,洪金寶看透咁話:「我關心都冇用。」成龍對此表現傷心?洪金寶話:「調轉我都傷心、心情唔好,有邊個老豆會哈哈哈,個仔咁真係唔開心。」至於有冇打電話俾成龍慰問,洪金寶話:「我冇,我驚佢鬧我,打電話去又唔知講乜,佢又唔知點答你,等佢靜一輪先至同佢溝通傾偈。」

對於最初得知祖名涉毒,作為長輩嘅洪金寶話好震驚,又讚祖名明平時好乖巧,佢話:「我次次見佢都遞支雪茄俾我食!」對於會否訓示祖名,洪金寶說:「使乜我訓示,發生呢件事,幾多人喺佢面前講,我再講就多餘,都要俾細路仔空間,俾佢心情平復番去面對,冇需要再去講同一樣嘢。」

洪天明早日前亦有帶同囝囝洪大仁(TJ)探爺爺班,洪金寶一副有孫萬事足說:「佢坐喺度嗌action,好有表演慾,叫爺爺最出力。」高麗虹指洪金寶早前捱病感冒,但見到孫仔就開心晒,高麗虹指天明鍾意小朋友,正努力再追,洪金寶就渴望再抱孫女。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載