蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年10月02日

【短片】【C1要聞】藝人10.1上街爭普選 發哥:政府做錯華仔:不要武力

建立時間 (HKT): 1002 06:00

遮打革命進入第三天,適逢昨日是10.1假期,逾10萬市民湧上街不是慶祝國慶,而是參與遍地開花的和平佔領,兩位民間特首都不再認命噤聲,周潤發在電話譴責政府:「市民學生爭取訴求好勇敢,令人感動,警方第一日已經係錯咗,使唔使用到掟催淚彈呀?學生全部都好理智,如果政府唔係有一個新方案,令到香港市民學生滿意,呢個抗爭我諗唔會停。學生叫梁振英落台,其實你叫邊個落台都無補於事,家最主要係解決咗個方案先。」

面對梁振英連日來力撐警方專業,又拒絕與學生直接對話,發哥說:「如果政府再用暴力對付學生,你令香港市民好反感。佢哋個訴求好清楚,點解你成日叫人袋住先,你唔可以接納一個方案,係政府你袋住先?咁有錢,你後面有中國backup你,我都唔知你怕乜?學生或市民如果達唔到要求,大家只會繼續拉布,應該討論一個方案,係雙方可以接受,咁先係解決方法。我唔想見到有邊方面受傷,學生係好理智好聰明和平抗爭,你毋須用咁暴力嘅催淚彈,你一定要解決咗佢先,你唔可以避,梁振英唔可以避。」
另一位民間特首劉德華就在華仔天地官網撰文「香港平安」,呼籲警方不要用武力:「香港人,都愛香港。爭取訴求,要關心自己、顧及大眾。大家都不要被少數挑釁者影響情緒。不要催淚瓦斯,不要武力,不要謾罵。學生們、示威者們,要擔心自己的安全,要知道有家人在擔心你們的安全。願香港平安。」

天后鄭秀文(Sammi)昨凌晨也在微博貼着黑衣相,留言:「香港所經歷的,實在令每個人內心充滿悲痛,最重要的是學生們和市民平安無恙。香港加油!」楊千嬅則在社交網貼公路相留言:「路要走下去,希望政府早日解決問題,聆聽聲音,不要武力,孩子們,群眾們平安。」

至於身在巴黎心在香港的何韻詩,昨出席LV時裝騷說:「唔係唔在乎內地支持者,但呢個時候個心叫你做,唔可以唔理。」對於很少藝人為普選發聲,阿詩體諒說:「相信好多藝人背後有成隊team要照顧要養,明白有啲人唔可以行得咁前,我、明哥(黃耀明)比較冇顧慮可以行前啲,呢啲位冇得諗,餓唔死。」前晚到金鐘派物資的謝安琪則說:「喺香港生活咗幾十年,我從來未見過執法人員將槍口指向無辜市民,好大衝擊!」

藝人也紛紛上街爭普選,去年被迫演出維穩騷「香港巨蛋音樂節」,揚言身在曹營心在漢的RubberBand成員泥鯭,連日都有現身撐學運,昨10.1就佔領銅鑼灣,他大讚學生熱血:「爭取真普選,撤回人大方案,仲有最重要係梁特首知道要退,知道要落台。」

石天欣、前有線主播張寶華分別跟媽咪到金鐘聲援,石天欣說:「因為我愛香港,唔想喺未來後悔自己無參與今次行動。」張寶華則說:「政府太傲慢,槍口點可能對住自己人民!」而麥子樂和王宗堯相約到銅鑼灣撐學生,麥子樂憶述當日中催淚彈情況:「距離2米有催淚彈,喉嚨好痛,全身好似搽辣椒膏咁。」王宗堯則讚學生有大將之風,香港人好團結。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載