蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年10月02日
馬上成為壹會員

【遮打革命】「朋友」投訴冇生意趙學而:如果政府諗多啲,咪唔使同藥房爭貴鋪!

建立時間 (HKT): 1002 06:00

一次「遮打革命」,可能令好多市民個fbunfriend咗好多人,有人係因為立場,其實更多係「價值觀」問題,眼前搵食重要,定係長遠香港嘅幸福重要呢?

有去示威現場嘅趙學而,今日就遇到呢個難題,佢收到一個「朋友」嘅訊息,佢「朋友」叫佢放過無辜小市民,話佢間鋪6日都冇生意,話佢太自私。香港核心價值係「阻人搵食尤如殺人父母」,一講搵食,個個唔敢開聲,唔敢講出問題核心,學而冇有怕,喺fb爆晒seed:

「劉先生,多謝你嘅評論。
更重要嘅係感謝你嗰句:"作為朋友"。
作為朋友,我非常尊重你發表言論嘅自由,但我希望你注意用詞方面,如果咁多年以來你覺得我係一個自私嘅人,我哋又點會做到朋友呢?

作為朋友,我知道你鋪頭唔喺示威者佔據嘅街道絕對係可以照常營業,當然顧客係會比平日少,但都只係呢幾日嘅事,長遠嚟講,只要經營有道,我睇唔到有乜理據會導致關門大吉。況且作為朋友我亦曾經為你哋嘅生意出過一分力,無論係親身行動以至研究、討論。

作為朋友,我梗係知道你啲員工要開飯啦,人人都要開飯o架!你鋪頭六日無生意,你朋友我係一個演員喺香港兩年無發市呀?作為朋友你有無問候過我有無飯開呢?你知唔知點解我無飯開呀?係因為特區政府嘅政策呀!如果佢哋肯發多個牌,好多人都有飯開呀!如果佢哋肯諗多啲經濟發展唔係依靠自由行同房地產嘅話,你就唔使同金鋪藥房爭貴鋪交貴租做生意呀!

作為朋友,我懇請你認真睇清楚,無論支持同唔支持呢次運動嘅人,全部都係無辜嘅小市民。你所講嘅"阻人生計,自己快樂"嘅究竟係邊個?
p.s.朋友,好多謝你嘅留言激發我將我部分嘅感受講出嚟!」

同時好多網民友都爆晒seed,有人留言:

「舖喺銅鑼灣,呢幾日生意額係零,我亦有啲徬徨!但我無怨言!因為我知道市民做緊乜?!我唔想做一個袖手旁觀,坐享其成,自私自利嘅人!如果今日無人行第一步!我相信我遲啲連樓上舖都做唔到落去!大家都要加油!」

亦有人話:「我兩間舖頭都喺正銅鑼灣SOGO隔離,呢幾日生意額都跌左6,7成,但我絕對唔會自私地遷怒於學生們,佢地係為香港未來出嚟捱苦,我無膽量去前線支持,只能盡力提供物資,經已覺得慚愧。
我都要開飯,我啲員工都要開飯,但唔認同將責任推哂俾幫緊香港嘅學生!
我支持學生,只因為我由出生到現在都係香港人,香港未來我都有份!」

再有人話:「影響佢生計?起高鐵個陣拆左人成條村,唔影響人地生計呀?領匯搞到幾多細商鋪俾人逼遷呀?唔影響人地生計呀?東北計劃為左起屋,拆左幾多條村呀?唔影響人地生計呀?」

「點解會無生意呢?你朋友間餐廳只做自由行生意?出面某D店舖因為UmbrellaRevolution反而做多左生意喎。」

邊個搞到香港產業咁單一?邊個搞到好似得返自由行生意?邊個搞到香港對單程證冇審批權?有人拆菜園拆東北村屋時,難度班村民冇影響?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載