蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年10月30日

【短片】【娛樂頭條】忽然反口出信阻開騷 TVB禁阿燦扮乜太

(攝影:陳俊強)
建立時間 (HKT): 1030 06:00

扮嘢能手廖偉雄,90年代為無綫主持的搞笑節目《笑聲救地球》口碑收視雙贏,最近阿燦重出江湖,原定於明年1月2至4日假九展舉行「燦神回歸乜太重出江湖救地球」演笑會,其中一個環節會扮經典角色「乜太」亮相。怎料大前日監製黎文卓突然收到無綫通知,不准阿燦再扮乜太,理由是演笑會不屬慈善性質,即使給版權費亦冇得傾。

阿燦、黃一山(細龜)、仙樂都等昨在尖沙嘴出席演笑會記者會,播出一段乜太在獄中的片段,指乜太當年因打小李(拍檔胡大偉)致重傷被判坐監,見乜太手持掃把示威及對抗,終於成功爭取到首位在獄中搽指甲及戴耳環的囚犯。乜太於記者會出場便教大家煮一味「港人散熱下火湯」,助手仙樂都即示範附身倒抽一口涼氣騷身材。

此時,黎文卓電話突響起,掛線後與乜太說:「剛收到TVB電話,知你出嚟,TVB話版權問題唔畀你再做乜太,個騷可能要取消。」乜太發癲謂:「咁你叫我出嚟做乜嘢?出獄嚟做乜嘢?」黎文卓說:「我哋非常尊重TVB版權,有向TVB申請過,不過佢唔畀你用。」乜太再火起說:「你o依家當我係乜嘢?已經20幾年你話唔畀就唔畀呀!」飾演「小小李」的細龜說:「咁你改姓囉。」乜太用手拍打小小李說:「我行不改名,坐不改姓,點解陳淑莊之前扮又冇事,我扮就犯規?你知唔知我一直以嚟喺電視台企咗咁耐,邊個喺背後睇住我?佢係六叔,係佢傍住我。雖然六叔今日……唔好講嘞,但六叔細佬七叔其實追咗我好耐,所以我家決定,跟七叔叫七太。」當短劇完畢,助手仙樂都將噴油遞給乜太,將佈景版上「乜」字噴成「七」。

其實無綫近年節目質素大跌,經常被指抄襲電影角色及卡通人物,而自家製扮嘢節目《Sunday扮嘢王》、《全家福祿壽》等曾扮不同的名人紅星,甚至日本卡通人物。如今突然阻阿燦開騷,即使付版權費都不准,似乎無綫有着雙重標準。

剛做完腎石手術的阿燦活動後接受訪問,他似心有不甘說:「我哋尊重版權,但呢個世界原創嘅人,都畀人話唔係原創,呢個人物係阿燦同阿卓諗出嚟㗎嘛。」是否金錢問題?他說:「畀錢佢都唔肯呀,你以為我哋冇錢咩?」有指乜太造型與特首夫人梁唐青儀相似,是否維穩台TVB怕乜太倒抽一口涼氣出事?他瞪大眼反問:「你幾多歲?我25年前都做緊啦,今日先嚟倒抽咩?我抽你呀!」會否覺無綫霸道?他說:「唔會,可能佢哋想我哋自己努力啲,可能政策唔同咗。」而昨無綫亦有派記者採訪。

阿燦以乜太造型為本報拍攝的訪問大前日出街,碰巧黎文卓大前日便收到無綫電郵不准阿燦扮乜太,被禁是否與無綫封殺壹傳媒有關?阿燦說:「成個訪問我都冇講我係邊個。」黎文卓則透露大半年前曾與無綫高層余詠珊洽談合作「笑聲救地球25周年」,當時對方反應正面,但之後TVB回覆指若要做,會自己主辦,黎文卓惟有把主題改為「燦神回歸」,只是其中一個人物是乜太,無綫版權部亦開出條件,他說:「當日係合理價OK,但突然回覆話唔得,慈善就可以。」90年曾志偉曾監製《笑星撞地球》電影,當年無綫亦「放行」,黎文卓說:「政策日日變,子華(黃子華)扮乜太可能冇事,唔申請靜靜雞做都冇事,燦哥扮番就樹大招風,不過家唔使畀版權費,七太冇限制,只係印過啲海報。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載