› 選擇地區
三藩市
紐約
洛杉磯
其他美國地區
香港 台灣 北美
 
2014年11月12日

【短片】【牛佬再爆seed】撰千字文狂爆粗:警察為市民服務?個個都有糧出0架!

建立時間 (HKT): 1112 06:00

早前一期《古惑仔》,封面以黃雨傘「佔旺」做背景,並以三名疑似紋身警察當主角,相當政治敏感。日前牛佬接受本報訪問時就話,呢個提議,本來係由作家向西村上春樹先提出,經朋友輾轉向牛佬建議,咁啱又發生「七俠打鑊」事件,牛佬於是用網上佔中原相改圖製作,成為佳話。

牛佬話,928警方施放催淚彈當日,佢都在場,牛佬話:「我睇住佢放催淚煙,個心好震撼,見有人吸好多煙,就好似要發哮喘咁。你問我,我一定企喺佔領嗰邊,爭取普選好需要,如果假普選都話公平,咁咩都得啦。」

但係眼見警方一邊施用武力,一邊向只係拎把遮作防衛嘅市民大嗌唔好衝擊警方,牛佬亦忍唔住,喺新一期《古惑仔》(第1764期)撰長文「怒吼」爆seed。最令牛佬憤怒嘅,係某些傳媒未有作持平報道,令牛佬嬲爆:「直頭火燒身嗰隻!」

呢篇長文,唔多唔少都有啲粗中帶幼嘅粗口,但無礙閱讀。牛佬先寫番當日佢喺金鐘政總親身經歷警方施放催淚彈同胡椒噴霧嘅情景,佢話:「啲催淚彈好似唔使錢咁,砰砰碰碰掟晒出嚟,啲胡椒噴霧就兜口兜面射,直情幫你洗面嗰隻!但係啲佔領人士呢?只係戴個眼罩,用把傘遮下……x佢老x咁樣又俾警方話係武器?又話人哋搵啲遮『篤』佢哋!但係以牛佬所見——邊個夠膽搵雨傘『篤』啲差佬?我剩係見到啲差佬攞住個盾牌,揸住碌警棍亂x咁扑落啲雨傘度,一路扑一路講:『你哋冷靜啲!你哋冷靜啲!』同一時間必然有個差婆揸住個大聲公:『前面嘅市民唔好衝擊警方防線,放低你哋嘅雨傘!』呢個做法係製造假象,想話俾佔領區以外嘅人士聽,「佔領」人士衝擊緊警方防線,警察只係自衛!」

牛佬再寫道:「實則,牛佬認為,班差佬用過催淚彈都驅散唔到佔領人群,於是就借意搵人發洩,攞碌嘢喺度亂x咁扑,啲胡椒噴霧俾佢哋用晒依然仲要噴!xxxx你噴啲嘢過嚟,人哋就梗係用把遮頂住0架啦!仲叫人哋放低把遮,你唔係智障係0架係嘛?」

講完警方使用武力,牛佬把火猶未熄,怒斥警方權責不分,一方面拉人去暗角打鑊再話係個別事件,同時又講到自己「好偉大」:「成日扮偉大講埋啲類似以下嘅說話:『警察係為市民服務嘅!如果冇咗警察,試諗下你哋會點?』你都xxx嘅,你班警察唔好就搵過第二班囉,有乜問題呀?為市民服務?外賣嗰個阿姐都係為市民服務啦,我哋寫公仔書都係為市民服務啦!個個都有糧出0架!除非有人冇糧出,就真係為民服務喇!」

原汁原味版本: http://bit.ly/1pPCPc1

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載