蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年12月02日

【短片】【C1頭條】全副裝備踩落龍和道 王宗堯:良心要我行出嚟

王宗堯自雨傘運動開始已經支持,前日他一身裝備現身龍和道撐學生。
建立時間 (HKT): 1202 06:00

佔領行動前日第64日,學聯和學民思潮將行動升級發動包圍政總,其間與警方爆發衝突,有示威者被警方打至頭破血流,不少市民趕到金鐘支援,包括近日憑《選戰》張癸龍角色而人氣急升的王宗堯。前晚學民思潮在facebook貼上王宗堯現身龍和道的照片,相中他戴上頭盔及掛上眼罩等裝備,並留言:「點解唔嚟得?我都係香港人嚟。」被網民盛讚有型有骨氣,瞬即將他封為男神。

原來王宗堯留守至昨日凌晨4時許才離開,他返家後亦在有fb向各方好友報平安。對於網民激讚,王宗堯昨在電話中淡然說:「我身邊有好多朋友都咁做,當然我哋受注目嘅程度係比其他人高,但係唔覺得因為咁而對我有牽制。」他揚言是響應雙學呼籲前往金鐘,前晚完成工作後於晚上9時到場會合朋友,他說:「我哋喺添馬公園靠近龍匯道,最初只係見到好多人圍住,但無耐見到差人開始打前排嘅示威人士,我哋想睇吓有乜嘢可以幫到手,所以好快走咗去示威嗰邊,靠近暗角嗰邊個草坡,有乜事都可以聲援,直到差唔多兩點清場嗰陣,有人大嗌盡快向後退,咪向碼頭嗰邊走。我哋留到4點幾先決定離開,臨走前將自己啲頭盔同用具畀最前線嘅人,返到屋企睇新聞睇到好攰先瞓得着。」

提到昨日凌晨留低裝備,王宗堯直言心情難過:「唔知點解香港會變成咁,我嘅良心話畀我聽,係應該行出嚟,我唔忍心亦唔放心留喺屋企,我有好多朋友一直都冇離開過,死守咗好多晚,我會覺得當你假裝當冇一件事,匿埋做鴕鳥唔去睇,你比嗰啲人更加可悲!」未知經理人有否反對他繼續站出來?王宗堯說:「呢兩年出咗嚟好多次,包括國教、HKTV、7.1、六四,甚至劉進圖事件,老闆同同事都知,佢哋知我咁大個人,有判斷能力,所以唔反對,只要唔激進就得。」

可擔心事件惡化?他說:「我見到今朝政府出聲明,譴責所有出嚟嘅市民同示威學生,我睇到好痛心。由學生衝入公民廣場嗰一刻,原意係保護學生,冇諗過會進化到今日呢個地步,只不過時勢係要去到呢一刻,要用自己能力去做呢一刻啱嘅嘢!呢一刻我對得住自己個良心。」

獲網民讚賞同時,也受不少網民攻擊,王宗堯說:「噚日有啲網友關注我微博,講咗啲好難聽同侮辱性嘅說話,好似話我唔使去大陸市場、唔使拍戲,我會覺得呢個始終係我屋企,如果將你自己屋企同埋工作去權衡呢件事,要為工作犧牲屋企,甚至乎你嘅屋企人,普通正常人都會保護咗自己屋企先!好多香港人都係咁做,令到我哋好感動,喺呢件事上,學生都好成熟,以前話90後態度好差,承受唔到壓力,但係家會見到呢一班好聰明同勇敢嘅學生。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載