蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年12月18日

【短片】【IronMan淆底?】「永不寫歌俾謝安琪」 EricKwok:玩啫,唔好咁認真!

建立時間 (HKT): 1218 06:00

男女男,得個嬲字。郭偉亮(EricKwok)忽然話以後唔會再寫歌畀Kay唱。件事係同今年7月嗰時Eric喺紅館開嘅演唱會有關。曾經寫咗首《囍帖街》令到Kay升呢嘅Eric,最近踢爆話Kay本來應承咗做嘉賓,初時同佢通電話仲講到話好想出席,但最後就甩底。

開騷嗰陣,其實EricKwok都有講過點解謝安琪甩底,嗰陣又唔覺佢咁勞氣;估唔到事隔咁耐,忽然又舊事重提。結果謝安琪經理人夏森美即馬上回應話:「當日我哋好有禮貌咁善意回覆佢話冇檔期,當日真係喺外地做嘢,但係佢三番四次喺公開場合繼續講呢件事,其實係相當令人討厭。」仲話明將來應該冇合作機會。

其實唔少高登仔雖然都係捧Kay做女神,但同時又戥IronMan唔抵,紛紛上番Kay個微博研究下究竟當日Kay係唔係真係唔得閒。有人話佢當日喺微博貼圖織手繩,亦有人話佢係去內地開工,而唔係如夏森美所講嘅外地。咁如果Kay應承EricKwok在先,甩底又真係唔啱……不過高登仔愛護女神,自自然然就將焦點擺去夏森美度啦。

咁件事點收科呢?竟然係三個字:講下笑啫!事緣EricKwok之後再受訪時,就同人講,話:「我同阿Kay真係冇嘢喎,都有同佢講聲唔好意思,因為嗰篇報道其實係我講緊笑嘅時候講,我都係講笑,真係一場誤會。玩啫,唔好咁認真。」下?原來EricKwok係講笑咋……咁豈非變成係班幫手搵證據撐EricKwok嘅高登仔變咗真心膠?

不過,睇番個訪問,其實EricKwok講嬲嬲豬Kay嗰陣,又真係笑笑口,扮嬲咁樣嘅……下次EricKwok做訪問時最好幫自己拍埋片,有咩「伊郁」都可以馬上拎番出嚟澄清嘛!

夏森美又點回應EricKwok呢個笑話呢?咁EricKwok係咪真係有打俾Kay講聲唔好意思?夏森美就話:「邊度有呀!佢自己咁講啫!唔想再講呢件事喇!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載