蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年12月26日

【短片】【被生日…】唱錯生日歌送錯cake 朱咪咪驚恐:點解今日變咗我生日?

攝影:仇志德
建立時間 (HKT): 1226 06:00

HappyBirthdayTo咪咪,HappyBirthdayToYou……今日不少人都留言祝福靚靚朱咪咪今日60歲生日快樂,就連港台都準備咗個生日蛋糕同咪咪一齊慶祝啦,點知……今日原來唔係咪咪生日,而係十月呀!噢賣尷!

話說今日朱咪咪同張智霖齊到灣仔伊館出席港台活動「國際家庭年閉幕禮」,咪咪話佢咁多年來都冇收過聖誕禮物,因為自己總係付出嗰個,跟手梁榮忠就推咗個生日cake出嚟,諗住全場唱happybirthday同咪咪朱慶祝生日同boxingday快樂啦,點知咪咪朱揚一揚手,爭在未講個「啋!」未講。

咪咪朱好緊張咁,連連揮手話:「錯!錯!錯!我唔知點解今日會變咗我生日,我由今朝收嗰啲生日祝福收到依家。其實我係十月0架。」只見咪咪朱身邊嘅張智霖都呆咗一呆。

之後女主持打完場話:「唔緊要,都係生日0架喇!」梁榮忠都講:「咁多人同你一齊慶祝,簡直係一個最大型嘅生日會!」咪咪朱見自己講完等如冇講咁,亦一臉無奈,但都好大體地謂:「多謝多謝!」但梁榮忠仍未放手,叫埋張智霖一齊全場大合唱生日歌……

咪咪朱情急智生,出絕招,就係拎走蛋糕上有「happybirthday」個牌仔:「就當係今日係boxingday,做阿爸同阿媽嘅禮物喇!」跟住仲同張智霖一齊唱:「世上只有媽媽(爸爸)好,有媽的孩子像個寶……」司儀即趕緊叫全場一齊打拍子……最後咪咪朱用掌風整熄蠟燭……喇。

講到同仔女關係,咪咪話佢都試過當頭棒喝,當年佢送仔女去新加坡讀書,佢就一個人返港拍劇撲水搵錢,有時成幾個月都唔返去探佢哋。點知有次,佢喺新加坡嘅女性朋友話佢知,有次同咪咪個仔傾偈,講起咪咪,點知阿仔竟然話:「我唔想提佢…」自此之後令咪咪朱明白冇嘢比仔女更重要,所以依家即使得三日假,都會飛過去探佢哋0架。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載