蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年01月12日

【金像獎前奏】《紅Van》膺最佳影片、導演 青雲趙薇封帝后

建立時間 (HKT): 0112 06:00

香港電影金像獎距今仲有一段時間,不過由資深影評人組成嘅「電影評論學會」今日就公佈咗由佢哋票選嘅2014年度得獎名單,最佳電影係由陳果執導嘅《那夜凌晨,我坐上了旺角開往大埔的紅VAN》,仲拎埋最佳導演。

至於最佳編劇就有兩個,分別係《單身男女2》嘅韋家輝同《親愛的》嘅張冀。影帝同影后分別《竊聽風雲3》嘅劉青雲同《親愛的》嘅趙薇奪得。

《紅Van》囊括兩項大獎,出品人WinnieTsang接受本報電話訪問時就話:「呢部戲係香港先至有,成件事好香港。」佢又謂台前幕後收到得獎消息之後都好開心。Winnie話:「呢個係2015年第一個獎,之前已經喺Yahoo搜尋人氣拎咗大獎。」提到導演陳果話過會拍續集,咁幾時成事?Winnie表示:「點都好,續集一定拍,有頭有尾。依家部戲未賺錢0架,都未賣埠,總之最快年底或者明年初開拍。大方向已經傾咗,大家想知故事個結果係點。」

Winnie又話,陳果知道得獎後當然好開心,但不忘溫馨提示大家,喺金像獎投佢一票:「希望大家唔好因為戲名太長而唔投我票啦。」Winnie並謂下個目標——即係金像獎啦,如果只可以捧走一個獎,佢希望係「最佳電影」:「呢個獎可以代表全部人,咁當然,如果有咁多得咁多就最好。」

至於第四度捧走電影評論學會影帝殊榮嘅劉青雲(98年《高度戒備》、01年《絕世好Bra》同2012年《奪命金》),就簡單回應道:「好開心,今次得獎係意料之外。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載