蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年01月28日

【短片】【有留意高登瓊姐喎!】千嬅自嘲「樂壇人瑞」仲請Sammi做嘉賓!

建立時間 (HKT): 0128 06:00

先係前晚同「交惡」(當事人表示唔係)十年嘅容祖兒擔任個唱嘉賓,經典一抱被譽為「一抱泯恩仇」。係真不和定假乜乜都好,能夠做番朋友,誠屬美事。

噚晚千嬅第四場「楊千嬅Let'sBegin世界巡迴演唱會2015」開鑼,全場爆滿,黃耀明捧場,千嬅老公丁子高亦繼續每晚喺觀眾席打氣。呢晚嘅特別嘉賓,係鄭秀文(Sammi)。冇錯,就係傳聞中惡鬥十幾年嘅Sammi。嗰陣兩位天后由樂壇頒獎禮鬥到去影壇,一時傳千嬅抄足Sammi形象同歌路,一時傳千嬅減價搶戲拍仲學足Sammi走「儍大姐」路線,令二人關係緊張(都市傳說係咁講……)

噚晚Sammi一身型爆中性打扮出場唱《終身美麗》,全場驚喜。唱到一半,千嬅從舞台另一端升上台,二人手拉手合唱後擁抱,千嬅更感動到眼濕濕,俾Sammi取笑:「搞乜鬼呀你?」千嬅就話:「我真係太開心啦!」

Sammi對觀眾說:「呢度係千嬅嘅唱會,你哋一定係好鍾意佢先至買飛嚟睇,唔通好憎佢又嚟捧場咩?」然後她率領全場大叫「楊千嬅你最索」和「楊千嬅你最掂」,千嬅亦回敬Sammi叫全場大嗌「Sammi你最索」,Sammi立即笑說:「唔使講啦,我知呀!」

千嬅又話:「我好衷心咁多謝你,我演唱會可以請到你,無遺憾架喇!大家好奇點解我會請Sammi?其實除咗我喜歡佢之外,因為我出道嘅時候,好多人都將我哋成為話題!」

此時Sammi立即哄個頭埋去千嬅個頭旁邊,說:「真係似咩?(其實都有啲0架!)不如我哋組成Twins啦,長做長有,不過我哋有啲超齡!」千嬅立即笑說:「冇所謂0架,依家興呀,我成日見到啲網民寫『樂壇人瑞』!你知嘛,做到人瑞係件好大成就,我都不知幾想,咁可以對個仔耐啲!」哄堂大笑。千嬅又感動地說:「我真係冇遺憾,我依家好似發緊夢咁,MagicMoment!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載