蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年02月11日

【喪打人情牌】救亞視員工等如救亞視?邏輯大混亂

(攝影:仇志德)
建立時間 (HKT): 0211 06:00

亞視今日突然於總台吹雞開記招,宣佈「慈善女王」趙曾學韞發動「一人一股救亞視」行動,呼籲香港市民一人一萬蚊入股救亞視。點解搞成咁?德勤代表今早已於記招交代過,有三家投資者入標,但主要投資者唔滿意個價,暫時賣唔成。咁一日冇白武士,一日就冇糧出,年關到喇,亞視一班員工,點算好?

今日呢個記招,眾嘉賓包括趙曾學韞、劉詩昆、藍鴻震、劉建成、亞洲會會長魏秋樺同亞洲會理事長王文漢等個個情辭懇切講到亞視同香港人血肉相連,講到香港人好有同情心等等等等,希望真係可以用「良心」打動港人,一人一萬蚊入股救亞視。

記招結束前,執董葉家寶再謂:「好多謝今日咁多位都特登改機票嚟撐我哋。我同趙太識於微時,成卅年…欠薪拖糧事件,真係令我成長好多,我希望我哋同亞視可以風雨同路,前景更光明。」

至於今次一人一股救亞視,方才趙曾學蘊已表示行動前已徵詢法律意見,葉家寶亦表示:「唔係想做就做,要喺香港法例下釐定所有手續,希望可以盡快公布細則,幫亞視員工。依家情況係好嚴峻,因為年關就到。」之後又向嘉賓逐一送上贊助商之玉石,主持人金鈴即又借題發揮,話玉石越耐越潤,就係靠人嘅溫度,而呢種溫度來自支持亞視嘅人,呢種叫做「人情味」喎。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載