蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年02月11日

【一人一萬救亞視】入股後會否債務上身? 發起人話唔會葉家寶:應該唔會

攝影:仇志德
建立時間 (HKT): 0211 06:00

今次發起「一人一股救亞視」嘅趙曾學韞,於亞視大埔總台記招後接受訪問,佢話原意係想大家一人一萬捐亞視,得知呢個做法係唔可行先轉為一人一股構思,佢表示今次行動係想幫助仍堅守崗位亞視員工,希望助佢哋度過年關,問到每人最多可以認購多少股時?佢話:「私人最多十股,一間公司最多五十股。」

講到點保證售出股份後收到資金可以順利作薪金到員工手,趙曾學韞指一切資金會交到律師樓,佢強調出糧畀員工係佢今次構思原意,又表示以佢所知,買得亞視股份係唔需要承擔亞視債務問題;至於一切法律問題,則留待亞視處理及回應。

亞視執行董事葉家寶希望整個計劃能在農曆新年前開始集資,因為趙太概念係幫員工過年,佢話:「當白武士仲有一段時間先出現之前,短期解決到係有朋友想認股,希望係一人一股,但要經過法律諮詢同法庭程序完成,先開始收錢,詳情稍後再公佈。」

葉家寶表示經已跟持有10.75%股份的黃炳均聯絡,對方同意售出股份並若果收到資金後都不會抽走資金,會暫時借用給亞視作燃眉之急,問到會否擔心王征阻撓?佢話:「相信黃炳均有同王征溝通。」葉再指亞視於本月十八日前是緊急時刻,趕住出糧之餘亦要付牌費,需要三千萬左右資金,而亞視已售出農地,所以相距目標資金不太多。

講到萬一今次「一人一股救亞視」計劃失敗,有冇其他救亡計劃?葉家寶再重申以往出售版權、廣告權及經營權的做法,佢仍對白武士出現表示樂觀。

講到認購一股後,會否承擔亞視債務,葉家寶謂:「應該唔會,我哋仍有呢座大樓同好多資產。」而將來白武士是否承諾會回購今次股票?佢話:「現時有興趣投資嘅人都唔止剩係想買10.75%股份,係想買多啲,甚至全部,所以相信佢哋會買回,若果將來佢哋想多啲人參與亞視,就等白武士決定。」佢強調一切仍要經法庭及法律程序。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載