蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年03月13日

【攬住個獎唔放】何超儀被讚「唔扮嘢唔遲到唔擺款」

(攝影:陳俊強)
建立時間 (HKT): 0313 06:00

噚晚「香港專業電影攝影師學會」周年晚宴,現場設有「攝影師眼中最具魅力男女演員」獎,男演員就由林家棟奪得,何超儀就拎到女演員。

該會前會長劉偉強就頒獎俾林家棟,永遠榮譽會長黃岳泰就頒俾何超儀,而現任會長談智偉就頒「最傑出攝影獎」俾電影《黃飛鴻之英雄有夢》嘅攝影師伍啟銘。

黃岳泰喺台上就話係頒俾兩個演技好嘅演員,讚佢哋有專業精神,又唔扮嘢唔遲到唔擺款,劉偉強附和話:「係呀,我哋唔係普選,只係揀我哋眼中嘅男女演員,呢兩位都好值得拎呢個獎。」

何超儀攞完獎攬住唔放,佢做訪問時表示好開心:「由一班專業攝影師俾我,演員有幾努力,攝影師就會好清楚。」記者問佢係咪唔遲到唔扮嘢?佢話:「係呀,唔敢遲到,自己都好認真,自己都覺得拍戲好好玩,所以好投入。」

超儀話嚟緊未有新電影工作,等《全力扣殺》上就做宣傳,佢又透露話:「3月15號(星期日)一班演員會同世界冠軍王琳一打十,王琳佢一打十。」講到佢隻腳拍戲整傷,佢話:「係呀,之前整親,前排自己都去咗滑雪,膝頭哥好攰,都有搵醫師去舒緩膝頭。」整親仲去玩?佢話:「咁好玩,總之留小小力去工作,已經好返10成。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載