蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年03月13日
馬上成為壹會員

【短片】【23條禁止抗命?】疑UA突然抽起 全澳門都冇得睇《馬丁路德金》

根據網頁顯示,《馬丁路德金-夢想之路》喺澳門係B級,即未滿十三歲不宜觀看,但依家此該片正式上映,竟然變成全澳門人都冇得觀看。
建立時間 (HKT): 0313 06:00

「Ihaveadream...」

一首奧斯卡得獎歌曲《Glory》,便將六十年代民權領袖馬丁路德金(MartinLutherKing,Jr.)為非裔美國人爭取人權的故事,跟香港的雨傘運動連繫起來。主唱者Common於致謝辭中,提到象徵美國有色人種爭取投票權的地標塞爾瑪(Selma),並以此連結世界各地民眾對公義的追求,包括香港追求民主的雨傘運動。

香港版本嘅《馬丁路德金-夢想之路》(Selma),不少中文字幕用上「光明磊落」及「深耕細作」等繙譯外,情節亦有不少地方跟雨傘運動相似,香港觀眾欣賞時定必有一番感受。與香港只是一河之隔嘅澳門又如何?根據澳門網媒《愛瞞日報》報道,澳門冇得上。

據《愛瞞》報道,佢哋曾向該片發行商驕陽電影公司查詢,該公司指並無澳門院線代表來看該片嘅試映。該公司亦表示UA嘅代表有去睇試映,結果香港多間UA院線都有得上,惟澳門銀河UA卻未有排上檔期。驕陽電影表示佢哋只屬被動角色,一部戲係咪可以放,主要都係睇院線根據檔期同觀眾口味等因素選擇。

《愛瞞》亦曾向澳門銀河UA查詢,對方回覆指,確定唔會上映《Selma》,佢哋未有回應係咪同政治因素有關,只係強調檔期無法排上這套電影。澳門銀河UA又指,是否選擇放映,係由UA港澳兩地嘅公司一同決定。《愛瞞》再向澳門大會堂查詢,但未獲回覆。至於永樂戲院及旅遊塔影院亦未有安排上映《Selma》。

睇番網上資料,其實澳門銀河UA曾安排《Selma》上映,級片係B,即未滿十三歲不宜觀看,但依家就冇咗。該戲院共有9間放映院,依家上緊15部戲,包括《12金鴨》、《皇家特工:間諜密令》、《解碼遊戲》、《千騙萬化》、《雛妓》、《賭城風雲2》、《荒失失企鵝》及《格雷的五十道色戒》等等,當中不乏係上月已開始獻映、上足一個月嘅戲。竟然騰不出任何檔期上映《Selma》,頗令人費解。

不少澳門網民對本片翹首以待,豈料竟無緣於澳門親睹,自感失望。有人質疑係咪同維穩有關,亦有網民發起組團來港欣賞。咁又係,隔條河而已,唇亡齒寒,你懂的。

澳門已就23條立法,《大公報》就曾經話:「鄰近的澳門在2009年完成對23條立法,澳門近年政局穩定,經濟欣欣向榮…(下刪一萬字)」喺咁「安全」嘅環境下,《Selma》呢類戲,算唔算癲覆?算唔算啟發人心呢?

又,之前話「為港人福祉個人榮辱不足道」、堅持引入國安法嘅港區人大代表吳秋北指,澳門已立23條,但目前為止澳門市民自由並冇減少,冇人因為23條被冤枉或拘捕,證明23條非可怕事物……係囉,咁點解澳門又唔播《Selma》?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載