› 選擇地區
三藩市
紐約
洛杉磯
其他美國地區
香港 台灣 北美
 
2015年03月23日

【再執導要報仇】張家輝又拍鬼片:邊度跌低邊度起返身

(攝影:陳慧安)
建立時間 (HKT): 0323 06:00

今日喺灣仔會展舉行嘅香港影視博覽星光熠熠,中午有「天下一ONECOOL」大型發佈會,有張家輝、林家棟、李燦琛、林德信、張繼聰等等有份拍「天下一」電影嘅演員出席。

當中兩部電影,其中一部叫《死開啲啦》係由林家棟做監製,由林德信、張繼聰、河國榮等演出,林德信今日話:「我做1920年嘅殭屍,2014年醒咗,呢部戲入面,第一次俾火燒俾刀插。」而張繼聰就話:「自己戲入面本身百幾年前做林德信嘅書僮,之後俾林德信吸咗血變殭屍,之後喺香港生活咗百幾年,從來冇瞓過覺,喺香港為租屋生活而努力,反映反社會問題。」原來O依家啲殭屍咁慘,都要同人類爭地方住,殭屍片咁寫實,真係唔知笑定喊好。而J.Arie就話自己戲入面做港女,成日黑面。

另外一套由張家輝做導演叫《陀地驅魔人》,演員有家輝,黑仔姜皓文同張繼聰以及蔡思貝等,家輝仲有白髮造型,佢話:「呢個故事係喺Youtube睇到個鬼故,之後就開始發展劇本,上次執導《盂蘭神功》有愧,拍完《賭城風雲》休息咗幾日就決定開拍,邊度跌低邊度起返身。」佢話戲入面除咗白髮造型仲有紋身,佢今日又手拎一個污糟黑色公仔,話係戲入面個小朋友死咗拎住嘅公仔,佢話:「今次自己導演,想用自己方法去拍,拍左1/3左右,今次套戲自已剃光頭再用頭套。」

問佢幾耐冇剃光頭,家輝話:「十幾年,自從十幾年前喺大陸橫店拍古裝之後,估唔到唔拍古裝都要剃頭,返到屋企個女話我Ugly,仲有紋身,其實都幾得意。」問佢係咪「喺邊度跌邊度起身」?佢話:「係呀,上次觀眾同媒體都係錫住我,雖然(《盂蘭神功》)上咗有千零萬,不過自己都係唔舒服,心有不忿要報仇,打比鍾珍話想拍呢部戲,鍾珍就話『咁拍囉』,就開始籌備,呢部成本上算係好豪華製作。」咁有冇將自己份片酬放入去投資?佢話:「自己邊度敢收片酬,如果overbudget都可能要自己撳機拎返出嚟。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載