蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年04月09日

【短片】【製作認真】「皇阿媽」刀痕位連戲 《導火新聞線》道具唔識穿越時空

刀痕位置同傾斜度都脗合。(網上圖片)
建立時間 (HKT): 0409 06:00

港視《導火新聞線》近排成為網上熱門討論嘅「神劇」,雖然劇中難免有啲位係有瑕疵,但無影響劇集可觀性,單單係全實景拍攝、唔用大台常用嘅「世界光」,已令網民拍爛手掌。

噚日有網民「史健仁」翻查睇完第22集,見演「皇阿媽」嘅梁小冰早喺第二集街頭被斬留下嘅傷痕,竟然於第22集重現,當然係已結痂,唔止冇傷口位置冇錯,就連刀痕位置同傾斜度都脗合,大讚估唔到製作咁認真。

唔少網民見佢個留言,更回覆「睇呢啲細位就知有無heart」、「認真的是潘漫紅、方俊華等一眾幕後人員」及「劇組人員太強勁」。亦有人話,皇阿媽由第一集開始都係著冬裝,卻罕有地喺呢集露臂,認為係編審同皇阿媽特登「騷」出嚟,就係等有緣人同眼利之人發現呢啲精細位。

《導火新聞線》唔止對連戲嘅要求高,仲要求道具配合時代。「史健仁」(佢真係睇得好足!)日前已有po,貼出早前一集倒敘式講番2005年某日,石俊賢議員(李忠希飾)俾駱應鈞搵人掟落樓嗰場,劇情講當時有個女仔(何詠雯飾)咁啱喺對面天台影相,竟將整個過程攝入鏡。

重點係,當時何詠雯拎嘅係菲林機,眼利嘅「史健仁」指出佢拎嘅係2000年頭出嘅CANONEOS300,屬機身輕巧型,好啱女仔用,乎合角色設定,道具亦唔會忽然穿越「時空」,係做足功課。

史健仁留言謂:「其實呢個shot可有可無,就算要拍,是旦搵部黑媽媽嘅單反,離遠拍一個shot就得,但導演偏偏要拍近鏡,仲要搵返一部當年流行而且適合女仔用嘅菲林機連戲,就值得拎出嚟講下。連戲本來係編劇嘅基本要求,係香港卻成為罕有之事,其實係香港人嘅悲哀。」

亦有細心網民發現,方凝回憶初出道時(都係約7年前),喺一個關懷無家者嘅記者會上,有記者拎住部手機撳撳撳,而呢部手機,就係2005年嘅PanasonicX800手機。該網民謂:「呢半秒內出現嘅手提電話,可以話同劇情完全冇關,可見整套劇嘅認真程度極高!」

見微知著,難道香港人唔值得擁有一個用心經營嘅免費電視台?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載