蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年04月10日

林文龍新片擸10獎 《來生不做香港人》導演發行多阻滯

林文龍同林熹瞳喺《我們停戰吧!》發展師生關係,故事穿梭70年代至今日香港。雖然得了多個海外獎項,但至今仍未找到發行商。
建立時間 (HKT): 0410 06:00

港視唔知係咪風水唔好,免費電視牌攞極都攞唔到。估唔到起用大量港視藝人林文龍、林熹瞳(Rachel)、黃美棋,仲有港視劇《來生不做香港人》導演陸天華去拍嘅電影《我們停戰吧!》都遇上好多阻滯。

曾經做過「怪談女」、後嚟簽咗港視做藝人嘅Rachel,舊年失業後膽粗粗攞住自己寫嘅劇本去搵投資者,最終獲黃玉郎同林文龍賞識,投資數百萬元開拍,跟住自己做埋女主角。早前喺印度諾伊達國際電影節獲最佳電影及最佳女主角,之後再獲聖地牙哥獨立電影節連頒8個獎項,文龍升呢做影帝,Rachel更成為雙料影后。

據知《我們停戰吧!》被嫌題材唔夠商業化,話晒人哋係一個好勵志嘅故事,但聽講好多電影發行商都嫌卡士唔夠勁,拒絕畀《我們停戰吧!》片上映,由影后變埋「跑腿」嘅Rachel噚日接受《蘋果》電話訪問,表示:「我做埋阿四搵咗多間發行商,睇完試片都話好睇,但又覺得題材唔係太商業。」係咪被嫌卡士弱?佢話:「其實文龍都有游說過我唔好做女主角,但我話咁辛苦做咁多嘢,目的只係想做演員;我知道市面上冇人會揀我,排隊都唔到我做呢個位,但佢見我咁堅定,最後都好支持!」

個性樂觀嘅文龍就撐到底:「我永遠覺得係劇本行先,冇好劇本發哥搭妮歌潔曼都係死。如果每部戲都係嗰幾個卡士,新人邊有機會上位?」黃玉郎就話有信心最終會搵到發行商,佢講:「攞到咁多獎係喜出望外,部戲夠質素就唔使擔心咁多。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載