蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年04月11日

【短片】【掩眼法都冇】網民直擊 踢爆《街頭魔法王》換杯麵「魔術」

幾大個工作人員喺背面!
建立時間 (HKT): 0411 06:00

大台啱啱播完嘅《至尊街頭魔法王》,網民除咗怒轟主持人吳若希高八度喪叫嘅聲線(新聞連結: http://bit.ly/1FwUI0z ),噚日仲有網民喺youtubeupload咗條片,而呢條片就影到《至尊街頭魔法王》嘅穿崩片段喇。

呢位網民就喺一間便利店,就用另一個角度影到4月7號播出嘅《魔法王》嘅拍攝過程,當中魔法王Louis就變一個杯麵嘅魔術,係講空嘅杯麵,變成有。睇電視畫面播嘅時候,就好神奇咁,係喎,點解嘅點解嘅點解嘅點解嘅點解嘅點解嘅……耳膜都穿,但,同一時間,俾呢位網民影到佢穿崩。

話說當Louis喺鏡頭前故弄玄虛,係咁晒杯麵「吉」杯,然後眾主持就講嘢分散觀眾注意力,與此同時,Louis右手忽然擺咗喺身後,古古怪怪唔知做乜。再睇番網民條片,原來喺眾人身後,有工作人員拎個有料嘅杯麵畀Louis,再極速爬走。Louis偷龍轉鳳後,喺鏡頭前扮下嘢做幾下手勢,噢no!嘅點解嘅點解嘅點解嘅點解嘅,點解個吉杯有麵嘅?

《魔法王》標榜嘅「此鏡頭不經刪剪」,係真嘅,因為全程都係用鏡頭遷就角度拍攝,所以係唔需要刪剪。而之後個工作人員呢,仲即刻彈番起身,扮路人甲乙俾表情。到底個現場有幾多人係工作人員呢?又到底有冇真正嘅現場觀眾呢?

高強嘅魔術師,係唔會畀大家睇到穿崩,而觀眾最享受嘅過程,就係搵唔到穿崩。節目名叫《街頭魔法王》,應該係畀街頭嘅人睇,但係呢個《街頭魔法王》就喺街頭嘅人會睇到穿崩,「現場觀眾」原來係工作人員,實在離奇。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載